HARI SATU, 14 MARCH 2022

MIRI: Jerayawara Sahabat Astronomi ke diatur Opis Menteri Pelajar, Inovasyen enggau Pemansang Pengelandik Sarawak (MEITD) ngembuan tuju deka nempa mayuh agi nembiak sekula di nengeri tu landik ba pelajar Sains, Teknologi, Engineering enggau Matematik (STEM).

Menteri Perengka Pengangkut Sarawak, Dato Sri Lee Kim Shin madah, tu seririh enggau juluk ati Perintah Sarawak ti deka meda nembiak Sarawak ngambi pelajar Sains manggai taun 2030.

“Siti ari tuju Perintah Sarawak nengah Pelin Pemansang Udah COVID-19 2030 (PCDA 2030) iya nya deka nempa 45 peratus nembiak sekula sekondri ngambi pelajar Sains ba taun 2030,” pia ku iya madah.

Iya bejaku munyi nya maya bejadika Program Jerayawara Sahabat Astronomi 2022 di Miri, kena Hari Enam.

Dulu ari tu, program ke sebaka kala diatur di Kuching, Sibu, Bintulu enggau Gedong taun siti tadi.

Naka ke diatu, program nya mujur matak 6,000 iku mensia mayuh.

Sama bela datai, Sekretari Mendam Opis Menteri, Inovasyen enggau Pemansang Pengelandik Sarawak, Halina Haron Abdillah, bala prinsipal, kepala pengajar enggau pengajar Sains. -EDISI UKAS