HARI SATU, 14 MARCH 2022
KUCHING: Turu Ekonomi Gagasan Anak Sarawak (TEGAS) besaup enggau Shell Malaysia majakka pengawa meri awak ngagai orang dagang ke dipilih bela ngambi ba dagang Shell Malaysia.
Sapit Menteri Pengeraja Asal Enggau Pemansang Mengeri ke mega Chairman TEGAS, Datu Len Talif Salleh madah, sida ulih besaup lalu meri pemaik ngagai rayat Sarawak lebih agi ba pengawa nyungkakka pemansang dagang enggau nyaup ngerembaika dagang kompeni sereta orang dagang rama ba nengeri tu.
Iya madah, asil pemujur kompeni ti ngemunka dagang ari Program Shell LiveWIRE ti inovatif nyadi peransang ngagai rayat Sarawak bela ngemeranka pengawa dagang.
“Nengah jurulatih pengawa dagang enggau meri palan endur gawa, orang ba pengawa dagang ti disaup program nya udah mujur nerima mayuh anugerah.
“Kami berasai temegah ati alai beberapa iku rayat Sarawak nengah Program Shell LiveWIRE tu udah nempa nama sereta mujur ba pengawa dagang entarabansa,” ku iya bejaku munyi nya maya bejadika pengerami Anugerah Shell LiveWIRE Sarawak 2021 di Kuching, kena Hari Satu.
Ba program nya, Datu Len nyuaka basa ngagai lima dagang ke nempa penyulut nengah program pemansang orang dagang Shell LiveWIRE 2021 ke nerima geran bedagang RM15,000 enggau lalau pengawa dagang ba pengelama 12 bulan dikena nyaup sida ngepun sereta ngerembaika dagang.
Lima pemenang ba program tu iya nya Aaron Tan Chun Kwang ari UAS Mapping, Nisha Haslinda Hasbi ari Bintulucoffeescape, Anne Isabelle Chi ari Ruti & Kupi, Tom Low Sing Ho ari Bless Borneo Camper enggau Muhammad Hafiz Hariz Khatem ari Komubox. -EDISI UKAS
