HARI DUA, 15 MARCH 2022
KUCHING : Menteri Pelajar, Inovasyen enggau Pemansang Pengelandik, Datuk Roland Sagah Wee Inn udah nemuai ngagai Centre of Technical Excellence Sarawak (CENTEXS), kena Hari Satu.
Penatai iya maya nya dikena beratika program latih enggau meda kediri infrastruktur latih ke disediaka CENTEXS Kuching, Santubong.
Program nya dipunka enggau penerang ari Tuai Pegawai Eksekutif CENTEXS, Sayeed Mohd Hussein Wan Abdul Rahman bekaul enggau program enggau perengka guna ke bisi di CENTEXS.
Ku iya, CENTEXS diatu udah ngerembai di selampur Sarawak alai bepalan di Kuching lalu bela bisi di Lundu, Dalat, Lawas, Betong enggau Mukah.
Nangkan ke nya, Datuk Roland Sagah ngabas Servis Komersial CENTEX, Akademi Digital, Pusat Kecemerlangan Perbadanan Ekonomi Digital Sarawak enggau Galeri Warisan.
Iya madahka diri berasai gaga CENTEXS ulih besaup enggau ejensi entarabansa ke bepengelandik ba teknologi digital enggau pelajar teknikal.
“Premier Sarawak siku ari orang ti ngembuan runding ti jauh lalu iya deka meda mayuh bengkah pekara baru, ukai semina dalam nengeri tang mega ba renggat entarabansa.
“Nya alai ba CENTEXS, sida besaup enggau raban bepengelandik ari menua bukai ba teknologi enggau teknikal alai kitai ulih meda mayuh bengkah teknologi dikena nentuka pengawa dipejalaika enggau silik,” ku iya madah ba aum media udah ngabas perengka guna enggau akademi di CENTEXS.
Bela datai iya nya Sapit Menteri Pelajar enggau Inovasyen, Dr Annuar Rapaee, Sapit Menteri Pemansang Pengelandik, Datuk Francis Harden Hollis enggau Sekretari Mendam Menteri Pelajar, Inovasyen enggau Pemansang Pengelandik, Datu Kameri Affandi. -EDISI UKAS
