HARI DUA, 15 MARCH 2022

LUNDU: Chara lama ngereja pengawa betanam betupi patut diubah ngena chara moden dikena nyungkakka tikas pengelikun barang pemakai di Sarawak.

Menteri Betanam Betupi Moden enggau Pemansang Kandang Menua Sarawak, Dato Sri Dr Stephen Rundi Utom madah, sida ke betanam betupi nyengkaum orang bumai patut ngena chara baru nya kelimpah tau bendar nambahka penyampau penatai sida.

Ku iya, ba asil padi di Sarawak, orang bumai ditu semina ulih meri 38 peratus ari penyampau beras ba nengeri tu.

“Aku andal amat deka meda madang babas diubah nyadi umai tauka alai betanam nanas ti tau mai penatai ke chukup manah ngagai rayat ke diau di menua pesisir,” pia ku iya madah.

Iya bejaku munyi nya maya ngulu pengawa ngetau padi di Skim DID Tanjung Purun di Kampung Stunggang Melayu, Lundu kena Hari Satu.

Kelimpah ari nya iya mega madah, ari 140 hektar pemesai umai Skim DID Tanjong Purun, 10.72 hektar ditanam enggau padi bansa MR269.

Padi dia ditanam bulan Oktober 2021 suba ke tau diketau dalam kandang 104 hari ngagai 112 hari lalu ngenataika asil 25 metrik tan.-EDISI UKAS