HARI DUA, 15 MARCH 2022
KUCHING: Perintah Sarawak nyukung pengawa ngaga Projek Hidroelektrik Mentarang Induk (MIHEP) ti disaup Sarawak Energy enggau PT Kayan Hydropower Nusantara (PTKHN).
Sapit Premier Sarawak Datuk Amar Awang Tengah Ali Hasan madah, pengawa Sarawak bela ngaduka pemansang kuasa hidro di Kalimantan Utara udah digaga ari saup Sarawak-Kalimantan Barat kenyau ari taun 2016.
“Peneleba Sarawak Energy ngaduka kuasa hidroelektrik enggau REBID ba Koridor Kuasa Tau Dikena Baru Sarawak (SCORE) nyadika pengelebih ngagai Sarawak Ngaga Taman Kuasa Gadung Tanah Kuning ti ngenegapka pemansang kuasa ba palan industri nya,” pia ku iya.
Iya bejaku munyi nya nengah penerang media udah ke betemu sereta baum enggau Menteri Koordinator Maritim enggau Pekara Pemeranak Puku Indonesia, Bapak Luhut Binsar Pandjaitan di Jakarta, Indonesia, kena Hari Satu.
Nangkan ke nya, datuk Amar Awang Tengah nguluka deligit Sarawak ngemataka Pengawa Sempekat Ketuai (HOA) entara Sarawak Energy enggau PT Kayan Patria Pratama enggau PT Adaro.
Sempekat nya mandangka Sarawak Energy enggau PT KPP nyadi pemegai pemeranak puku PT KHN ti deka ngatur pengawa besaup enggau PT Adaro ba program pemansang MIHEP.
Ari pengawa tu, pemansang MIHEP deka digagaka nyadi pemansut kuasa ke ulih dikena baru ngagai KIPI tanah kuning dikena nyukung Program Pemansang Industri Bepelasarka Kuasa Ulih Dikena Baru (REBID) perintah Indosenia.
Datuk Amar Awang Tengah maya nya mega ngarika Perintah Sarawak meri jaku terima kasih ngagai Perintah Indonesia ketegal sukung enggau bantu diberi ngagai Sarawak Energy enggau PT KHN kenyau beberapa taun tu dikena ngaduka MIHEP.
Sama bela datai maya pengawa tu iya nya Menteri Utiliti enggau Telekomunikasyen Sarawak, Datuk Julaihi Narawi, Sapit Menteri Kuasa enggau Pengelikun Ramba Menua, Dr Hazland Abang Hipni sereta pemesai ke bukai.-EDISI UKAS
