HARI TIGA, 16 MARCH 2022
KUCHING: Sapit Premier Sarawak, Datuk Amar Awang Tengah Ali Hasan betuaika deligit Perintah Sarawak ngulu aum begulai enggau Menteri Energi Enggau Sumber Daya Mineral Indonesia (MEMR), Bapak Arifin Tasrif, kena Hari Dua.
Datuk Amar Awang Tengah madah, aum nya sebagi ari program nemuai bejalaika pengawa dua hari berunggu ngagai Jakarta betemu enggau Perintah Indonesia lalu ngenataika sukung Perintah Sarawak ngagai pengawa ngaga pemansang Projek Hidroelektrik Mentarang Induk (MIHEP).
Ku iya, Perintah Sarawak bela ngambi bagi ba projek nya nengah PT Kayan Hydropower Nusantara (PT KHN), siti kompeni ke bela disaup Sarawak Energy Berhad.
“MIHEP diatu benung ba renggat besedia alai aku ke nyadi menteri ke megai pekara kuasa, penemu enggau sukung ari MEMR deka dikena lebih agi ba pekara minta permit ari opis menteri nya,” pia ku iya nengah penerang media.
Awak nya mega dikena iya meri terima kasih ngagai MEMR ketegal ke udah meri sukung enggau bantu ngagai Sarawak Energy sereta PT KHN ba pengawa ngaduka projek hidroelektrik betikas besai nya.
Bela nyempulang maya pengawa tu iya nya Menteri Utiliti Enggau Telekomunikasyen Sarawak, Datuk Julaihi Narawi, Sapit Menteri Kuasa enggau Pengelikun Rampa Menua Sarawak, Dr Hazland Abang Hipni, bala pemesai opis perintah sarawak enggau pengari ari Sarawak Energy.-EDISI UKAS
