17 MARCH 2022

LAWAS: Projek ngaga Sekula Primeri (SK) Awat-Awat diatu udah naka 98 peratus lalu semina nganti disambung karan aja.

Sapit Menteri Infrastruktur Enggau Pemansang Penyangkai Kapal Sarawak, Ir Aidel Lariwoo madah, taja projek napi penanggul laun ketegal Atur Mindah Betagang (PKP), suntuk kereban dikena ngaga enggau orang gawa tang projek nya ulih dipajakka.

Naka ke diatu, projek nya udah ngaga blok opis, kelas, agu, prasekula, kuarters pengajar, palan jaga, langkau basikal, palan muai uras, rumah pam, tung ai, bilik komputer enggau makmal.

“Kediatu kitai lantang ati enggau projek ke digaga tu taja betapi enggau penanggul ketegal COVID-19 kelimpah penanggul bukai baka penanggul ba kereban ngaga tauka penyampau orang gawa,” pia ku iya.

Iya madah munyi nya ba aum media udah ke nemuai ngagai SK Awat-Awat kena Hari Tiga.

Iya mega madah, projek nya dipelabaka tembu bulan April 2022. -EDISI UKAS