HARI DUA, 22 MARCH 2022
KUCHING: Bida penempa nyadi tuai ukai agi nyadi penanggul ba pemansang teknologi digital maya hari tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya andal, dalam kandang 10 ngagai 20 taun agi, bida entara lelaki enggau indu ukai nyadika pelasar pemujur sesebengkah pengawa.
Ku iya, batang penanggul ti nekul pemansang orang indu ngambika sebela enggau sida ke lelaki iya nya peragam mensia mayuh ti meri bida ngagai orang indu enggau lelaki.
“Sapa ke nyadi tuai dudi hari ila bepanggai ba sida ke bisi penau ba pemansang teknologi sereta bisi penemu enggau pengelandik. Ukai ketegal lelaki tauka indu,” pia ku iya madah.
Iya bejaku munyi nya maya bejadika pengawa nutup Bootcamp Sarawak Women Of Tomorrow 22 (Swot 22) di Kuching, kena Hari Satu.
Nambahka jaku iya, Datuk Patinggi Tan Sri Abang Zohari madah, pekara pengarap enggau bansa mega enda ulih dikena ngelai pemujur pengawa.
Iya maya nya bela madah, nengeri tu kaya enggau pemansut pengeraja asal lalu begunaka pengeransing dikena bejadika juluk ati perintah mai pemansang ngagai ekonomi menua.
“Aku andal, kitai ulih nyadika chunto ngagai nengeri bukai ba pengawa ngaduka pemansang ekonomi menua,” ku iya madah baru.
Woksop ke diatur nya disaup opis Menteri Orang Indu, Nembiak Mit Enggau Pengelantang Mensia Mayuh, Yayasan Kepimpinan Wanita enggau Huawei Malaysia ba pengelama dua hari berunggu lalu digulu 30 iku penyereta.
Awak nya mega dikena Premier Sarawak ngenataika jaku pengaga ati ngagai penyereta woksop nya ke pemadu nyulut, Anastasia Lim Kim Pin ari Gerempung Wang Turu Pengereja Pengawa (KWSP) enggau Farah Nadia Masrol ari Naim Holdings Sdn Bhd ti bela nerima bursari RM10,000 siku. -EDISI UKAS
