HARI TIGA, 23 MARCH 2022

KUALA LUMPUR: Sarawak ngerikod 198,095 tauka 69.3 peratus nembiak ke beumur 5 ngagai 11 taun udah betuchuk dos keterubah vaksin COVID-19 naka 22 March tu tadi.

Sapit Menteri Pengerai I, Dato’ Dr. Noor Azmi Ghazali madah, sida nerima vaksin nya nengah Program Vaksinasyen COVID-19 (PICKids) ke diatur berengkah 3 Februari 2022 ba sekula, klinik pengerai tauka sepital nyengkaum fasiliti luar.

“Sarawak udah ngerikod pemadu mayuh nembiak betuchuk vaksin ba menua tu ari PICKids,” pia ku iya maya nimbal tanya Kaban Parlimen Igan, Ahmad Johnie Zawawi ba Dewan Rayat, kena Hari Tiga.

Nerang enggau nyemetak, iya madah, bisi 286,000 iku nembiak ke beumur 5 ngagai 11 taun di Sarawak tau betuchuk vaksin COVID-19.

Awak nya mega dikena Dato’ Dr Noor Azmi muji pengeransing perintah nengeri enggau raban ari Opis Menteri Pengerai Malaysia sereta Opis Menteri Pelajar Malaysia di Sarawak ke udah nentuka program nya dipejalaika enggau mujur lebih agi di menua pesisir.

“Pemujur tu mega bepun ari penemu bala apai indai di Sarawak ti bela nerima tauka besetujuka program betuchuk vaksin ungkup anak sida,” ku iya madah baru. -EDISI UKAS