HARI TIGA, 23 MARCH 2022
BINTULU: Opis Pemansang Bintulu (BDA) ke udah ditumbuh kenyau 44 taun suba nyadi ejensi pemansang enggau opis bekuasa menua ngelanggur sereta ngaduka pemansang Bintulu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemansang Bintulu dilanggur tauka dilangkar nengah beberapa pelin besai ti ukai semina ba pemansang infrastruktur aja tang bela nyengkaum pemansang sosio-ekonomi.
Ku iya, ari pasar orang berikan ke diwan 5,000 iku mensia mayuh aja diatu Bintulu nyadi mengeri pemansut asil gas enggau minyak sereta bisi nyauka 230,000 iku peranak ti mega mengeri keempat pemadu besai di Sarawak.
“Bintulu, baka ke ditemu semua kitai deka majak mansang nyengkaum ba menua seberai Kuala Kemena iya nya Jepak.
“Pemansang tu disungkakka enggau projek ngaga jematan lalu enda lama agi enti udah tembu jematan tu deka nyadi kelai baru ngagai Bintulu,” pia ku iya madah.
Iya bejaku munyi nya maya Pengerami Apresiasyen Opis Pemansang Bintulu (BDA) 2022 di Bintulu, kena Hari Dua.
Nambahka jaku iya, Datuk Patinggi Tan Sri (Dr) Abang Zohari ke mega Chairman BDA madah, kelai baru nya bela mai segang pemansang ngagai mengeri Bintulu enti Jepak enggau Bintulu Proper dijantil enggau Opis Perintah Bintulu ke baru.
“Nangkan ke nya, kitai deka ngemansangka genturung pendiau nyadi moden sereta numbuhka palan dagang ba dia.
“Semua tu ngelai pengeransing kitai ngaduka pemansang mengeri Bintulu kenyau ari BDA ditumbuhka nyentuk ke sehari tu,” ku iya madah baru.
Pengerami lemai nya bela digulu Menteri Betanam Betupi Moden enggau Pemansang Kandang Menua, Dato Sri Dr Stephen Rundi Utom, Menteri ba Opis Premier Sarawak, Datuk John Sikie Tayai, Sapit Menteri Infrastruktur enggau Pemansang Penyangkai Kapal, Dato Majang Renggi, Sapit Sekretari Perintah Nengeri (Transformasyen Sosio-Ekonomi), Dato Sri Mohamad Abu Bakar Marzuki, Residen Sitak Bintulu, Datu Jack Aman Luat, Sapit Chairman BDA, Dato Haidar Khan Asghar Khan, Menijar Besai BDA, Datu Muhammad Yakup Kari enggau Kaban Parlimen Bintulu, Dato’ Seri Tiong King Sing. -EDISI UKAS
