HARI TIGA, 23 MARCH 2022
BINTULU: Bintulu deka nyadi sitak kedua nangkan Kuching deka digagaka Sistem Transit Aliran Automasi (ART) ba tuju ngemuntangka pejalai ari pasar ngelawa palan industri di Kidurong.
Premier Sarawak Datuk Patinggi Tan Sri (Dr.) Abang Abdul Rahman Zohari Tun Datuk Abang Openg madah, iya deka ngungkupka belanja dikena ngaga ART ti deka dipenyadi dalam kandang lima taun tu.
“Dikena kitai nyungkakka pengawa di Tanjung Kidurong, enda alah ke enggai kitai ngaga sistem perengka pengangkut mensia mayuh ari pasar Bintulu ngelawa Tanjung Kidurong lalu sistem tu patut dikemanahka kitai agi nengah pengawa ngaga jalai ART,” pia ku iya madah.
Iya mantaika pekara nya ba mua urung 500 iku bala mayuh ke bela ngulu Pengerami Apresiasyen Opis Pemansang Bintulu (BDA) 2022 di Bintulu, kena Hari Dua.
Ba pekara bekaul, Datuk Patinggi Tan Sri Abang Zohari mega madahka Bintulu ukai semina mengeri industri aja tang bisi ngembuan rampa menua ke manah baka tebing tasik enggau kampung sereta Taman Negara Similajau ti tau bendar matak penatai temuai baikka ari menua tu empu tauka menua bukai.
Dulu ari nya, iya mega madahka Tanjung Kidurong deka nyadi palan pemansut petrokimia ari gas tasik ke endang diempu Perintah Sarawak lalu deka nempa menua nya nyadi palan pemansut gas hidrogen.
“Kelimpah ari nya, pengawa ngaga hab pengawa berubat iya nya ari pemeranak puku ke datai ari Amerika Syarikat mega benung diaduka kitai.
“Ba renggat keterubah, penyampau ari beranakka puku iya nya RM200 juta lalu tu ditangkan RM800 juta ba renggat kedua ba endur ke sebaka ti deka numbuhka awak kereja puang urung 15,000 iti dalam kandang empat taun tu,” ku iya madah baru.
Iya madah, tu sebagi ari kelai orang beranakka puku menua bukai andal ke pengawa Perintah Gabungan Parti Sarawak (GPS) ngaduka ekonomi di nengeri tu.
Kelimpah ari nya, Bintulu mega deka nyadi palan pemansut gas hidrogen keterubah di Malaysia ti ulih mansutka urung 100,000 tan hidrogen lalu deka matak pemeranak puku baka Samsung ari Korea enggau Sumitomo ari Jipun meli hidrogen nya.
Sama bela datai maya pengerami tu iya nya Menteri Betanam Betupi Moden enggau Pemansang Kandang Menua, Dato Sri Dr Stephen Rundi Utom, Menteri ba Opis Premier Sarawak, Datuk John Sikie Tayai, Sapit Menteri Infrastruktur enggau Pemansang Penyangkai Kapal, Dato Majang Renggi, Sapit Sekretari Perintah Nengeri (Transformasyen Sosio-Ekonomi), Dato Sri Mohamad Abu Bakar Marzuki, Residen Sitak Bintulu, Datu Jack Aman Luat, Sapit Chairman BDA, Dato Haidar Khan Asghar Khan, Menijar Besai BDA, Datu Muhammad Yakup Kari enggau Kaban Parlimen Bintulu, Dato’ Seri Tiong King Sing. -EDISI UKAS
