HARI LIMA, 25 MARCH 2022
KUCHING: Sarawak Multimedia Authority (SMA) dipadu ngempu penuduk champian ba Pekit Inovasyen Ekonomi Digital 10+3 (ASEAN + China, Jepun enggau Republik Korea Selatan) nengah pekit ke dianjung, Sistem Operasyen ‘Bandar Pintar’ Sarawak.
Gela ke diterima nya disuaka Menijar Besai SMA, Dr Zaidi Razak ngagai Premier Sarawak ke mega Chairman SMA, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Opis Premier Sarawak, Wisma Bapa Malaysia di Kuching, sehari tu tadi.
Gela nya dipadahka diberi maya Forum Inovasyen Ekonomi Digital 10+3 2021 kena 8 Disember taun siti tadi.
Pekit nya diatur Akademi Teknologi Pemadah enggau Komunikasyen China begulai enggau Opis Industri enggau Teknologi Pemadah Yunnan ti mujur matak 200 penyereta enggau 26 finalis ari menua ASEAN, China, Jipun enggau Korea Selatan.
Tim SMA betuaika Tan Chee Kang begulai enggau Dulcy Pani, John Wong enggau Alexander Chu.
Ku Tan, pekit ke dianjung SMA nya nyengkaum inisiatif ke udah digaga suba, ke diatu enggau dudi hari lebih agi bekaul enggau Pelin Besai ‘Bandar Pintar’ Kuching ti udah dipenyadi Premier Sarawak kena 5 Oktober 2021.
“Sistem Operasyen ‘Bandar Pintar’ Sarawak iya nya langkar ke digaga Sarawak ngaga ‘Bandar Pintar’ ti bepelasarka servis ngagai rayat.
“Tu deka nyadi ekosistem ti lebih agi komprehensif,” ku iya nerang.
Nambahka jaku iya, iya madah, Pelin Besai ‘Bandar Pintar’ Kuching udah digaga nengah konsep sistem atur komputer ti nyadi pelasar ngadu enggau ngatur ekosistem ‘Bandar Pintar’ ba semua mengeri di Sarawak.
Kelimpah ari nya, Tan mega madahka pengawa sida ngambi bagi ba pekit nya bela ngembuan tuju mai nama Sarawak ngambika ditemu menua bukai lebih agi menua ti bela ngemeranka digital.
“Kitai deka meda Sarawak dikelala menua bukai ke endang udah nyikap diri ngemeranka digital.
“Nya alai, pekit baka tu nyadika chara dikena kami matak pemeranak puku enggau sida ti ngemeranka inovasyen digital ke manah agi,” pia ku iya madah.
Nangkan ke nya, Zaidi ba jaku iya madah, gela ke diterima nya nyadi pengering ngagai pengawa ke digaga Sarawak nyungkakka pekara enggau ekonomi digital.
Ku iya, semua patut ngayanka pengerindu besaup pengeransing ngemujurka pengawa digital enggau pemujur nempa ekonomi digital Sarawak.
“Sarawak menua ti keterubah iya di Malaysia ti ngemansangka pengawa enggau ekonomi digital.
“Seraya nya kami besai amat pengandal deka meda Sarawak bela tikas ba pekara tu manding menua bukai,” ku iya madah. -EDISI UKAS
