HARI ENAM, 26 MAC 2022
MUKAH: Institusyen Polis Menua deka terus bebendar ngetanka pengelikun enggau pengelantang orang periman ba menua tu, pia ku jaku Tuai Polis Pelilih (KPD) Mukah, DSP Muhamad Rizal Alias.
Ku iya, nyingkang ngagai umur 215 taun, iya nesau semua raban PDRM bela ingatka sumpah semaya ngagai Raja enggau menua sereta naka ulih nentuka pengelikun rayat enggau pengelantang menua terus dijaga.
Iya madah munyi nya maya ngintu Hari Polis Ke-215 ba mua Indu Opis Polis Pelilih Mukah kena Hari Lima empai lama tu tadi, iya mega nangkan semua polis terus bejalaika pengawa enggau profesional enggau negapka integriti dikena ngetanka penegap kunstitusyen enggau undang-undang.
Nambahka nya, ku iya, rambai jaku serak tu iya nya ‘Polis Dan Masyarakat Berpisah Tiada’ minta semua raban PDRM seruran sedia gawa enggau taluk dibaruh payung tambai ‘Sang Saka Biru’ maya bejalaika tanggungpengawa enggau pesan nyaga pengelikun raban bansa enggau pengelantang menua.
Berebak enggau nya, bisi lima iku polis nerima setipikit basa ari Kepala Polis Sarawak.
Pia mega, ungkup penerima setipikit ari KPD Mukah bisi 15 iku mungkur raban polis IPD Mukah, 4 iku pengari media nyengkaum Unit Komunikasi Awam Sarawak enggau 3 iku orang periman.
Bela bisi datai Pemangku Residen Sitak Mukah, Safrie Saili enggau Pemangku Pegawai Pelilih Mukah, Paleadadzman Ahip. – EDISI UKAS
