HARI ENAM, 26 MAC 2022
KUCHING: Berengkah 1 April 2022, pintu adan menua Sarawak deka dibuka baru ngagai temuai ari Semenanjung Malaysia tauka menua bukai.
Sapit Premier Sarawak ke mega Chairman Komiti Penyangga Penusah Nengeri (JPBN) Sarawak, Datuk Amar Douglas Uggah Embas madah, Atur Pengawa Standard (SOP) udah ditendur enggau palan Padang Bilun Entarabansa Kuching (LTAK) mega udah nyikap diri nyambut penatai temuai ari menua bukai.
“Berengkah 1 April, penerebai bilun entarabansa tauka ungkup penumpang entarabansa ke datai ari Singapura enggau penerebai domestik ari Kuala Lumpur, Kota Kinabalu tauka ari dini-dini nengeri nadai agi bekenaka SOP ba ditu.
“Tang ungkup penumpang entarabansa ke datai ari Singapura sida bisi dua kategori, kategori keterubah iya nya sida ke diau ba Singapura enggau peranak Singapura datai ngagai Malaysia nengah Sarawak. Nama ke patut digaga sida iya nya ngerejister nengah aplikasyen MySejahtera sereta ngisi Pom ‘Pra Berlepas’.
“Sida enda ibuh beperesa agi maya datai ba Kuching lalu ulih raun bejalai” ku iya madah ba aum pemberita pengudah ngabas LTAK kena Hari Lima apin lama ke udah.
Ku iya, ungkup penumpang dalam menua, sida enda ibuh ngisi ‘Enter Sarawak’ tauka ngisi pom ngaku ‘e-health’ (EHDF) tang patut nyimpan aplikasyen ‘MySejahtera’ enggau ngisi pom pansik bekaul aja udah chukup.
Nambahka nya, ku iya, ungkup penumpang ke transit ari menua bukai baka London, Australia, Jerman, Jipun tauka barang endur sida diau, raban penumpang nya dipinta mesti ngerejister diri ba aplikasyen ‘MySejahtera’ lalu sida dipinta ngaga peresa pra-masuk kediri empu dua hari sebedau bekejang.
Ngelansa pasal pintu adan menua Brunei enggau Indonesia, iya madah pekara nya benung dikerandau bekaul enggau SOP ke udah disetuju ungkup polisi udah 1 April.
“Lebuh nganti pemutus SOP nya ila, SOP ke diatu agi mengkang dikena.
“Kitai ngarapka dua bengkah menua nya ila ulih ngelengkaska pemutus muka adan menua, ngambika ulih muka sektor ekonomi menua kitai pulaika manah kelimpah sebagi ari pengawa kitai deka ngalih ngagai endemik,” ku iya.
Datuk Amar Douglas mega ngarapka pemutus ngalih ngagai renggat ‘endemik’, rayat deka berinsur pulai idup baka selama tang patut seruran ngadang enggau nyaga pengerai diri.
Kena 21 Mac tu tadi, Datuk Amar Douglas ba penerang iya madahka penatai temuai ari menua bukai dikemendar tama sereta enda ibuh ngisi ‘My Travel Pass’ tang, sida enda tau enda ngisi Pom ‘Pra- Berlepas’ nengah ‘Ikon Pengembara’ ba aplikasyen MySejahtera. – EDISI UKAS
