HARI SATU, 28 MARCH 2022
KUALA LUMPUR: Konvensyen Kaunseling Antarabangsa (ICC) 2022 ke deka diatur 1 ngagai 4 November tu ngena rambai jaku baru, ‘Standing Alone Together: Managing The Paradox’ ke dipilih dikena nyilih “Isu Kontemporari Dalam Kaunseling”.
Sapit Sekretari Perintah Nengeri Sarawak (Transformasyen Tikas enggau Pemanah Gawa), Datu Dr Sabariah Putit madah, rambai jaku nya dikena seririh enggau gaya ke nyadi ketegal pandemik COVID-19 ti balat ngenataika penanggul serata dunya maya hari tu.
Ku iya, program nya mega deka mandangka macham bengkah pengelebih ke dikembuan Sarawak baikka ari pemakai baka Laksa Sarawak, Mi Kolok, Bubur Pedas, Linut enggau Manuk Pansuh kelimpah pemanah rampa menua enggau main asal.
Beduduk ari pekara nya, iya ngarapka konvensyen nya ila deka mulaika pemaik ngagai rayat Sarawak lebih agi sida ti ngemeranka pengawa kaunseling enggau psikologi.
“Aku ngelaluka penatai semua ngagai konvensyen tu ke deka diatur ba Hotel Riverside Kuching, Sarawak,” pia ku iya bejaku ba Simposium Kaunseling Menua 2022 di Bangi, empai lama tu tadi.
Ba program nya, Datu Sabariah udah diberi gela Tokoh Pengurus Sumber Manusia Aplikasi Psikologi Kaunseling ti disuaka Menteri Pemansang Raban Indu, Ruang Bilik enggau Mensia Mayuh, Datuk Seri Rina Harun.
Sama bela datai, Presiden Gerempung Kaunseling Malaysia Entarabansa (PERKAMA International), Datuk Dr Abd Halim Mohd Hussin, Sapit Tuai Sekretari (Operasyen) Opis Menteri Pemansang Raban Indu, Ruang Bilik enggau Mensia Mayuh, Mohd Yusri Mohd Yusoff enggau Sapit Dekan Fakulti Sains Kognitif enggau Pemansang Mensia ti ngarika Mandal Canselor Universiti Malaysia Sarawak (UNIMAS), Dr Amalia Madihie. -EDISI UKAS
