HARI SATU, 28 MARCH 2022

LUNDU: Perintah Sarawak semampai chakah beratika pemansang sektor industri akuakultur ba nengeri tu ngambika ulih tetapika peminta menua tu empu enggau eksport ngagai menua bukai.

Pekara tu dipadahka Menteri Pengawa Betanam Betupi Moden enggau Pemansang Kandang Menua Sarawak (MANRED), Dato Sri Dr Stephen Rundi Utom maya iya nemuai bejalaika pengawa ngagai Ginger & Coconut Sdn Bhd, siti kompeni nupi ketam bakau di Loba Stoh, Rambungan, empai lama tu tadi.

• 

Maya nya iya madah, peminta ke mayuh ba ketam bakau nyadi siti ari pekara ke patut diperatika dikena nentuka bekal pemakai tauka ‘food security’ di Sarawak semampai bisi.

Penatai iya maya nya bela disempulang Sapit Menteri MANRED, Martin Ben enggau Pemangku Direktor Opis Betanam Betupi Nengeri Sarawak, Dominic Chunggat.

• 

Ba pekara bekaul, Ginger & Coconut Sdn Bhd siti kompeni nupi ketam enggau undang kelimpah kilang ngadu sereta nungkus.

Naka ke diatu kompeni nya bisi dua bengkah palan di Loba Stoh enggau 46 pegung di Telaga Ai.

Ari penyampau nya, 29 iti pegung dikena nupi ketam. -EDISI UKAS