HARI DUA, 29 MARCH 2022

KUCHING: Gerempung Raban Nembiak Menua Beserakup Sarawak (SABERKAS) deka numbuhka 82 iti pampang ba semua sitak Kunsil Nengeri (DUN) ba nengeri tu.

Presiden SABERKAS, Datuk Seri Abdul Karim Rahman Hamzah madah, naka ke diatu semina 78 DUN aja bisi pampang SABERKAS.

“Kitai merambu deka numbuhka pampang SABERKAS ba semua 82 iti penuduk DUN di Sarawak.

“Ari pampang nya, kitai ngatur program rayat baka SABERKAS Prihatin, Karnival Lumba sereta mayuh agi ke bukai alai tiap pampang nya diungkupka kitai enggau belanja RM10,000,” pia ku iya madah.

Iya bejaku munyi nya maya aum media udah betuai lalu bejadika Aum Komiti Besai SABERKAS Nengeri Sarawak Ke-54 di Kuching, kena Hari Satu.

Iya ke mega Menteri Raban Nembiak, Lumba Enggau Pemansang Orang Dagang madah, SABERKAS mega udah besetuju nambahka penyampau belanja RM21,000 ungkup tiap bengkah pampang dikena ngemujurka pengawa sida.

Ba aum nya, laman web SABERKAS bela dipenyadi sereta dikemataka Sapit Presiden Datuk Dr Abdul Rahman Junaidi, Mandal Presiden SABERKAS, Abang Abdul Aziz Datuk Abang Abdul Rauf, Sekretari Besai SABERKAS Safiee Ahmad, Mandal Presiden Lukanisman Awang Sauni, Dato Gerald Rentap Jabu enggau Dennis Ngau.-Edisi ukas