HARI DUA, 29 MARCH 2022
KUCHING: Perintah Sarawak ngemeranka pengelikun rampa menua di nengeri tu nengah ‘Sustainable Development Goals’ (SDG).
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu deka majakka pengerembai ekonomi ngelawa pemansang ari pengeraja asal ba ‘Sustainable Sarawak Blueprint’ ti mai semua ejensi perintah, dagang enggau komuniti bejadika pengawa nya.
Ku iya, langkar kereja nya bela deka dikena napi pekara bekaul enggau pengawa ngetanka biodiversiti enggau ngatur pengeraja asal dikena nempa rampa infrastruktur moden seririh enggau Revolusyen Industri Ke-4 menua.
“Pengeraja asal enggau kampung di Sarawak siti ari chara dikena ngambi karbon enggau palan biodiversiti di Malaysia.
“Nya alai, atur pengawa ke engkeman besai reti dikena nyaup pengeransing menua ngetanka abis nadai 50 peratus sitak kampung kelimpah Sarawak mega chakah nyaga enam juta hektar pemesai kampung lalu sejuta hektar digaga nyadi Palan Terit Dijaga (TPA),” ku iya bejaku maya bejadika Malaysian Conservation Conference 2022 (MCC) di Kuching, kena Hari Dua.
Premier Sarawak mega madah, gempuru tiga hari berunggu nya ti berambaika jaku “New Frontier in Conservation: Past, Present and Future” nyadika pelasar bejuraika penanggul ke ditapi bekaul enggau nyaga sereta ngintu global.
“Aku ngarapka nengah gempuru tu, kitai ulih nempa kaul perintah nengeri, sektor peribit, kaul entarabansa, institusyen pelajar enggau mensia mayuh ngambika ulih ngasilka program enggau chara ngintu biodiversiti integrasi, sosio-ekonomi pemansang enggau komuniti nengah chara praktikal,” ku iya.
Bela datai iya nya Sapit Menteri Pemansang Mengeri enggau Pengeraja Asal Sarawak, Datu Len Talif Salleh enggau Sapit Menteri Kuasa enggau Pengintu Rampa Menua, Dr Hazland Abang Hipni. -EDISI UKAS
