HARI TIGA, 30 MARCH 2022
SARIKEI: Sekretari Perintah Nengeri Sarawak, Datuk Amar Jaul Samion udah datai ngulu Program Randau #DIGITALSARAWAK ke diatur ba Rumah Nyuka di Lubok Lemba, Ulu Sarikei ditu, kena Hari Dua tu tadi.
Penatai iya disempulang Residen Sitak Sarikei, Felicia Tan Ya Hua, Direktor Unit Servis Moden Nengeri (UPPN), Michael Ronnie Langgong, Sapit Residen Sitak Sarikei, Abang Mohamad Porkan Abang Budiman enggau Pegawai Pelilih Sarikei, Christopher Ranggau Unting.
Sekeda ari pengawa ke bisi diatur maya program nya nyengkaum penerang bekaul enggau Sarawak ID enggau Portal Perintah Sarawak (SEG), mantaika penerang bekaul PANDei enggau penerang bantu ari Opis Pengintu Pengelantang.
Kelimpah ari nya, program nya bela bisi ngaga kaunter ari ejensi perintah enggau kompeni luar baka Unit Pengatur Ekonomi, Opis Pengerejister Menua, Bank Rakyat, Gerempung Wang Turu Pengereja Pengawa (KWSP) enggau Pustaka Negeri Sarawak.
Datuk Amar Jaul ba jaku iya ngarapka mensia mayuh dia bulih pemaik ari program ke diatur sehari nya.
“Taja Sarawak benung chakah ngaduka pengawa bekenaka teknologi digital tang perintah nengeri endang ngira sida ke empai datai bungkur internet ke manah.
“Ketegal nya, kaunter udah digaga ba Servis Sarawak sereta opis perintah ke bukai ngambika rayat ulih ngaduka pengawa bekaul baka bebayarka bil, pupu tanah tauka bepinta bantu ari perintah,” pia ku iya madah.
Dulu ari nya, Datuk Amar Jaul mega bisi ngabas Pusat Pentadbiran Bersepadu (IAC) Sarikei alai maya nya iya mendingka penerang ari Opis Kereja Raya Sarawak bekaul enggau pengawa ngaga projek opis nya.
Bengunan 12 ringkat nya dipelabaka deka nyadi palan baru Opis Residen Sarikei kelimpah opis enggau ejensi perintah Sarawak ke bukai. -EDISI UKAS
