HARI TIGA, 30 MARCH 2022
KUCHING: Raja Permaisuri Agong, Tunku Azizah Aminah Maimunah Iskandariah neruska pejalai iya ngabas Borneo Cultures Museum, kena Hari Dua.
Penatai Raja Permaisuri Agong disambut bini Premier Sarawak, Puan Sri Datuk Amar Juma’ani Tun Tuanku Bujang.
Pengawa Raja Permaisuri Agong ngabas muzium ke pemadu besai di Malaysia enggau kedua besai di Asia Tenggara nya dikena meda penyelai sejarah, arkeologi enggau main asal di Sarawak kelimpah seni enggau kraf.
Borneo Cultures Museum ke baru dibuka nya deka nyadi palan ke mesti dilawa mensia mayuh ke datai ngagai nengeri tu.
Bela nyempulang Raja Permaisuri Agong iya nya, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah enggau bini iya, Datin Sri Zuraini Abdul Jabbar enggau Sapit Menteri ba Opis Premier Sarawak (Undang-Undang, Sempekat Malaysia 1963 enggau Kaul Sarawak-Perintah Besai), Datuk Sharifah Hasidah Sayeed Aman Ghazali.
Dulu ari nya, Raja Permaisuri Agong ngabas Syarikat Jasmin Jawahar, siti ari premis bejual mayuh bengkah kain enggau songket di India Street Kuching. -EDISI UKAS
