HARI EMPAT, 31 MARCH 2022
SIBU: Ejensi Pemansang Ulu Rajang (URDA) diatu benung ngaga 43 projek infrastruktur besai ke beungkus RM1.5 bilion ba kandang menua nya.
Kaban Parlimen Kapit ke mega Menteri Dagang Dalam Nengeri enggau Pekara Bebeli Barang (KPDNHEP), Dato Sri Alexander Nanta Linggi madah, projek tu deka ngerandang jalai ngagai pemansang sosio-ekonomi lebih agi ba pengawa matak pemeranak puku ngagai menua ke dipegai URDA ba semua bengkah sektor ekonomi.
Projek tu nyengkaum ngaga perengka guna, pelin besai enggau bengunan.
Ku iya, penumbuh projek nya bela mai pangka ke besai ngagai tikas pengidup lalu nyempilka agi seraka pemansang rayat menua pesisir enggau mengeri.
“Projek infrastruktur baka jalai alun enggau jematan pekara ke endang dikemeratka digaga ba kandang menua ke dipegai URDA ti mega seririh enggau juluk ati Perintah Sarawak deka nambahka pemanah jalai alun di menua pesisir.
“Jalai alun enggau pemansang infrastruktur ti bekaul deka nyadi pemun ngagai pengerembai sosio-ekonomi rayat.
“Ketegal nya, naka ke diatu bisi 43 projek nyengkaum perengkaguna, pelin besai enggau bengunan ba Ejensi Pemansang Ulu Rajang (URDA) digaga enggau ungkus RM1.5 bilion,” pia ku iya maya bejadika pengawa nutup Kus URDA di Sibu, kena Hari Tiga.
Kelimpah ari nya, iya madah, Opis Pemansang Koridor Kandang Menua Sarawak (RECODA) udah numbuhka pelin besai khas dikena ngemansangka Kapit, Bakun enggau Belaga ke dipegai URDA dikena nyungkakka pengelebih pengerembai enggau matak mayuh agi pemeranak puku.
Iya nerang, Pelin Besai Kapit digagaka pasar baru ti mai pemaik ngagai Kapit ke besemak enggau entara Sarawak/Kalimatan udah ke indu menua Indonesia dipindah ngagai Kalimantan Timur.
Ku iya, Pelin Besai Bakun mega deka ditumbuhka dikena ngemujurka pengawa matak pemeranak puku nengah langur ngaga pasar enggau palan merindang ati ba tebing danau nya ti digaga ba tuju ngaduka danau Bakun iya ke mesai menua Singapura nyadi baka Tasik Como di Itali.
“Pelin Besai Belaga deka ngemeranka pengawa ngemesaika pasar ti dikemansangka ari penyangkai dia ke baru tembu.
“Ari semua pelin besai tu, ukai semina ulih ngangkatka tikas ekonomi tau mega tau bendar mai pengelantang rama,” ku iya nerang.
Bekaul enggau kus ke diatur sehari nya, iya andal makmal sosio-ekonomi nya pulaika pemaik ngagai pengawa nentuka pematut pekara ke digaga seririh enggau pelin pemansang sosio-ekonomi ti komprehensif URDA.
“Aku mega ngarapka makmal tu ulih nyaup RECODA enggau URDA mai pemeranak puku bela ngemujurka projek,” ku iya madah baru.
Woksop ke diatur URDA ari 28 ngagai 30 March 2022 nya ngaul semua pengari rayat ari sitak tengah Sarawak kelimpah pengari ari opis perintah, tuai raban bansa enggau pengari ari kompeni dagang menua tu.
Sekeda ke bisi datai maya program tu iya nya Kaban Parlimen Kanowit Datuk Aaron Ago Dagang, ADUN Belaga Datuk Liwang Lagang, ADUN Bukit Goram Jefferson Jamit, Kaban Parlimen Ulu Rajang Datuk Wilson Ugak Kumbong, ADUN Ngemah Anyi Jana, ADUN Machan Allan Siden Geramong, ADUN Pelagus Wilson Nyabong Ijang, ADUN Katibas Lidam Assan, ADUN Baleh Nicholas Kudi Jantai, ADUN Murum Kennedy Chuk Pai Ugon, Tuai Pegawai Eksekutif RECODA Datu Haji Ismawi Ismuni enggau Direktor URDA Joseph Belayong Punan.
Ngalihka lemai, Dato Sri Alexander bisi nemuai ngagai Opis Metrology Corp M Sdn Bhd. -EDISI UKAS
