PPNS Nyungkak Pengawa Numbuh Agropreneur Moden

HARI EMPAT, 31 MARCH 2022

KUCHING: Opis Menteri Betanam Betupi Moden enggau Pemansang Kandang Menua Sarawak diatu benung merambu deka nyungkakka tikas pengawa Gerempung Peladang Nengeri Sarawak (PPNS).

Menteri ba opis menteri tu, Dato Sri Dr. Stephen Rundi Utom madah, bala komiti PPNS udah dilempai enggau tanggungpengawa nimbal peminta perintah Sarawak ke deka meda agropreneur digaga moden agi.

“Kitai begunaka belanja ke besai, nya alai atur ke engkeman beguna bendar dikena ngelengkaska pengawa ke deka digaga PPNS.

“Sarawak nengeri ke besai lalu ngembuan pengeraja asal ke chukup manah tang nengeri ke kurang pemisi, nya alai kitai mesti ngubah imej tu lalu mutarka pekara nya enggau tanggungpengawa ti dikearap,” ku iya. 

Iya bejaku munyi nya ba pengerami makai lemai beserimbai enggau Aum Besai Ninting Taun Gerempung Peladang Nengeri Sarawak Ke-36 di Palan Konvensyen Borneo Kuching, kena Hari Tiga.

Dato Sri Dr. Stephen mega madah, orang betanam betupi enggau gerempung peladang di Sarawak patut beambi ulih ari program ke bisi ditumbuhka ba tuju bejadika juluk ati perintah Sarawak deka meda tiap ruang bilik orang betanam betupi bulih penatai RM6,000 sebulan.

Aum serak tu digulu 179 iku deligit ti ngarika 176,180 raban komiti peladang ari 28 PPK.

Bela datai, Sapit Menteri Betanam Betupi Moden enggau Pemansang Kandang Menua Sarawak (Betanam Betupi Moden) ke mega Chairman Gerempung Peladang Nengeri Sarawak, Datuk Dr. Abdul Rahman Ismail enggau Sapit Menteri Betanam Betupi Moden enggau Pemansang Kandang Menua Sarawak (Pemansang Kandang Menua), Martin Ben. -EDISI UKAS

add comment