HARI EMPAT, 31 MARCH 2022
SERIAN: Perintah Sarawak udah ngungkupka RM5.685 bilion ba Pakej Bantu Sarawakku Sayang (BKKS) dikena nyaup ngelempungka tating belanja rayat ti betapi enggau penanggul bepun ari Atur Mindah Betagang (PKP) nyengkaum orang dagang.
Sapit Menteri Dagang Entarabansa, Industri enggau Pemeranak Puku, Datuk Dr Malcom Mussen Lamoh madah, naka ke diatu mega RM210 juta bantu ba BKSS nyentuk BKSS 8.0 udah diungkupka dikena nyaup orang dagang nyengkaum dagang mit nengeri tu.
Ku iya, lebih 1,000 Dagang Mit enggau Jelan Besai (PKS) enggau dagang ba dagang temuai udah disaup enggau penyampau RM1.29 juta ba BKSS 6.0.
“Ba taun 2022, naka bulan March, bisi 38,570 orang dagang mit ke berejista nengah Opis Bekuasa Menua (PBT) nerima bantu RM38.57 juta dikena nyaup ngelempungka penanggul ke ditapi sida.
“Kelimpah ari nya, RM5 juta diungkupka ba Program Digital Sarawak 2022 ti diberi ngagai 5,000 orang dagang bebelika kereban digital baka laptop enggau kamera digital,” pia ku iya madah maya ngarika Sapit Premier Sarawak, Datuk Amar Awang Tengah Ali Hasan bejadika Program Jum Regista di Serian, kena Hari Tiga.
Iya mega madah, dikena nyukung Dasar Ekonomi Digital kelimpah Program Go Digital, MINTRED mega bisi ngaduka Digital Marketing Sarawak.
“Nyentuk March taun tu, lebih 8,000 orang dagang Sarawak udah dilatih nengah lebih 220 program ba Program Dagang Digital,” ku iya nerang.
Ba pengerami nya, Datuk Dr Malcom dipebasa nyuaka ‘Mock Check’ ngagai penerima bantu dagang di Serian.
Sama bela datai maya tu iya nya Kaban Kunsil Nengeri (ADUN) Bukit Semuja John Ilus, Residen Sitak Serian Tuah Suni sereta bala bukai.-EDISI UKAS
