HARI LIMA, 1 APRIL 2022
KUCHING: Sektor utiliti enggau telekomunikasyen nyadi batang pekara ngemujurka pengawa ngemansangka ekonomi enggau infrastruktur lebih agi ba transformasyen digital enggau pemansang sosial-ekonomi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penumbuh portfolio telekomunikasyen ba Opis Menteri Utiliti enggau Telekomunikasyen empai lama tu tadi megai pengawa besai mai nengeri tu mansang ngelawa ekonomi digital enggau ekonomi baru.
Ku iya, penumbuh opis menteri nya seririh enggau juluk ati Perintah Sarawak ti ransing begagaka perengkaguna mensia mayuh baka ai enggau karan ke beguna dikena ngubah ekonomi ngagai digital.
“Tu disungkakka agi enggau perengkaguna telekomunikasyen ti beguna amat ngagai tiap bengkah sektor ekonomi kitai,” pia ku iya.
Iya bejaku munyi nya maya bejadi Sarawak Utility & Telecommunication Conference 2022 (SUTC2022) ti berambaika jaku ‘Challenges and the Way Forward in Providing Utilities and Telecommunication in Sarawak by the Year 2030’ di Kuching, kena Hari Empat.
Premier Sarawak mega madah, taja bisi penanggul nyadi ba menua pesisir, nengeri tu agi ba jalai ke engkeman ngadu sereta numbuhka perengkaguna mensia mayuh ti deka pulaika pemaik ngagai rayat.
Kelimpah ari nya, ku iya, penumbuh sekula entarabansa ti bepelasarka mata pelajar Cambridge ti ngemeranka Jaku Inggeris enggau jaku bukai nyengkaum Jaku Mandarin beguna ba pekara komunikasyen global.
“Baka ke ditemu bala mayuh, kitai numbuhka sekula entarabansa bepelasarka pelajar Cambridge iya ke ngemeranka Jaku Inggeris enggau jaku bukai lebih agi baka Jaku Mandrin kelimpah jaku menua kitai empu.
“Ari pengelandik bekena jaku tu, kitai ulih begulai, berandau betikas global,” ku iya madah baru.
Pengerami maya nya bela digulu Sapit Premier Sarawak, Datuk Amar Douglas Uggah Embas, Menteri Utiliti enggau Telekomunikasyen, Datuk Julaihi Narawi, Menteri ba Opis Premier Sarawak, Datuk John Sikie Tayai, Menteri Perengka Pengangkut, Dato Sri Lee Kim Shin, Sapit Menteri Ultiliti enggau Telekomunikasyen I (Telekomunikasyen), Datuk Liwan Lagang, Sapit Menteri Utiliti enggau Telekomunikasyen II (Utiliti), Datuk Dr. Abdul Rahman Junaidi enggau Sapit Menteri Kuasa enggau Pengelikun Rampa Menua, Dr Hazland Abang Hipni. -EDISI UKAS
