HARI ENAM, 2 APRIL 2022
KUCHING: Pengawa bejadika Stesyen Minyak Petroleum Sarawak (PETROS) di Darul Hana, Kuching nyadi kelai siti agi pemansang ekonomi Sarawak ti tegap.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, juluk ati tiap iku rayat Sarawak deka meda nengeri tu bisi stesyen minyak kediri empu diatu udah nyata.
“Aku pechaya tu juluk ati semua rayat Sarawak deka meda stesen minyak PETROS tu digaga lalu baka saharitu kitai mujur bejadika stesen minyak ti bisi bemacham bansa minyak nyadi nyata,” ku iya bejaku maya bejadika Stesyen PETROS di Darul Hana, kena Hari Lima tu tadi.
Datuk Patinggi Tan Sri Abang Zohari mega madah, stesyen minyak ti bisi macham bansa minyak nya mega mandangka pemeras gawa Opis Pemansang Ekonomi Sarawak (SEDC) Energy nyadi pemun ngagai pengawa ngurangka agi karbon ke tau ngeruga pengelikun rampa menua.
“Pemansang stesen bemacham bansa minyak tu deka nyadi infrastruktur ti beguna bendar dikena nentuka karbon ti beresi kelimpah meransang bekenaka perengka pengangkut elektrik.
“Kitai mega mesti beratika pekara tu enggau silik agi laban diatu Sarawak benung ba jalai ke engkeman nempa nengeri tu ngelawa ekonomi gadung,” ku iya nambah.
Nambahka jaku iya, Premier Sarawak mega ngarapka rayat nengeri tu ulih meda Stesyen PETROS nya nyadi stesyen minyak ti tau ngechas perengka pengangkut karan dudi hari ila.
Stesyen bepelasarka 3 dalam 1 nya bisi minyak petrol, mogas enggau diesel, palan ngechas perengka pengangkut karan kelimpah ngisi hidrogen ke digaga SEDC Energy ti bela ngembuan tuju nempa rampa menua ke beresi sereta nyungkaka pengerembai ekonomi hidrogen di sarawak.
Bela dipadahka bisi enam Stesyen PETROS deka digaga di Sarawak iya nya dua di Kuching lalu bela siti di Sri Aman, Sibu, Bintulu enggau Miri.
Sama bisi datai, Sapit Premier Sarawak, Dato Sri Prof Dr Sim Kui Hian, Sapit Menteri Kuasa enggau Pengintu Rampa Menua, Dr Hazland Abang Hipni, Chairman PETROS, Tan Sri Datuk Amar (Dr) Hamid Bugo, Chairman SEDC, Tan Sri Datuk Amar (Dr) Abdul Aziz Dato Husain, Datuk Bandar Dewan Bandaraya Kuching Utara (DBKU), Datu Junaidi Reduan, Sekretari Wang Nengeri Sarawak, Dato Sri Dr Wan Lizozman Wan Omar enggau Direktor Unit Perancang Ekonomi (EPU) Nengeri Sarawak, Datu Dr. Muhammad Abdullah Zaidel. -EDIS UKAS
