HARI SATU, 4 APRIL 2022
KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima dua penemuai basa ba opis iya di Wisma Bapa Malaysia, kena Hari Satu.
Penemuai basa keterubah iya nya ari Gerempung China Muslim Malaysia Pampang Sarawak (MACMA Sarawak) ti betuaika chairman gerempung nya, Mohammad Tony Ong Abdullah.
Maya dirandau media udah penemuai basa nya, Mohammad Tony madah, tuju penatai sida dikena nerangka pejalai pengawa ke udah enggau ke benung digaga MACMA Sarawak.
“Premier Sarawak udah nyadi patron MACMA kenyau ari taun 90-an nyentuk ke diatu.
“Nya alai, penemuai basa seharitu tu dikena meri terima kasih ngagai iya lalu meri penerang bekaul enggau program ke deka digaga ila,” ku iya.
Nangkan ke nya, Premier Sarawak nerima penemuai basa ari raban Rumpun Silat Sarawak ti betuaika Presiden, Muhammad Haneef Ali.
Sekretari Kereja Rumpun Silat Sarawak, Mohd Azfar Ismail madah, penatai sida dikena meri pengaga ati ngagai Premier Sarawak ke pemujur Gabungan Parti Sarawak (GPS) ba Pengawa Bepilih Besai Nengeri Sarawak ke-13 tu tadi lalu mantaika Kaunsil Besai Rumpun Silat Sarawak ke baru. -EDISI UKAS
