HARI DUA, 5 APRIL 2022

KUCHING: Sapit Premier Sarawak, Dato Sri Prof. Dr. Sim Kui Hian udah datai ngabas projek ke digaga ba sitak Kunsil Nengeri (DUN) Batu Kawah, kena Hari Minggu tu tadi.

Pejalai iya sehari nya dipunka enggau pengawa ngabas projek nyaga Tebing Sungai Kampung Rantau Panjang iya ke digaga ba renggat kelima nyadi projek ‘Batu Kawa Riverbank Park’.

“Opis Parit enggau Entali Ai udah nyuaka kontrak ke beungkus RM11.3 juta dikena ngaga projek tu ngagai kontriktor ke baru dipilih ari tender tebuka,” pia ku iya ba laman Facebook.

Nangkan ke nya, Dato Sri Dr Sim datai mendingka penerang ari Opis Kereja Raya Kuching bekaul enggau projek ngemanahka ‘traffic light’ ba Desa Wira ti bekenaka belanja RM1.4 juta.

“Naka ke diatu projek udah digaga 80 peratus lalu dipelabaka tembu bulan Mei ke deka datai,” ku iya nerang.

Penatai iya sehari nya bela disempulang Direktor Opis Parit enggau Entali Ai Sarawak, Ir. Ahmad Denney Ahmad Fauzi. -Edisi UKAS