HARI DUA, 5 APRIL 2022

KUCHING: Opis Menteri Pemansang Raban Indu, Nembiak Mit enggau Pengelantang Mensia Mayuh (KPWK) Sarawak mujur ngatur woksop dikena mansik sereta berati baru bantu ke diberi sida nyengkaum ari Opis Pengintu Pengelantang Mensia Mayuh Sarawak enggau Opis Raban Indu enggau Ruang Bilik Sarawak.

Menteri ba opis menteri tu, Dato Sri Fatimah Abdullah madah, asil ari woksop nya endang dikena nyerenih lalu ngemuntangka agi pengawa meri bantu ngambika lebih sistematik ungkup rayat nengeri tu.

“Woksop ke diatur 17 ngagai 18 March tu tadi mujur ngempuruka 22 ejensi perintah, ejensi luar enggau gerempung ukai dikuasa perintah (NGO) ti bejuraika nama ke patut diaduka dikena ngamatka tuju woksop diatur kitai,” pia ku iya ba aum media di Kuching, kena Hari Satu tu tadi.

Iya mega madah, randau ke diulih ari woksop nya bekaul enggau chara mutar penanggul maya hari tu ke ditapi ejensi ti ngaduka bantu ngagai rayat.

“Bisi 10 bengkah bantu udah diperatika kitai baru lalu disungkak manah agi iya nya Bantu Beranak (BIB), Pembiayaan Caruman Minimum i-Suri, Endowment Fund Sarawak (EFS), Geran khas Ninting Taun (GTK) – Institusyen Pelajar Tumu Nembiak Mit (IPAKK), Kenyalang Gold Card (KGC), Bantu Pemati (BIK), Bantuan Khas Pesakit Tungkul Sengayuh (BPBP), Bantu Berubat, Geran Lumba OKU enggau Geran Pemerkasaan NGO,” ku iya nerang.

Nambahka jaku iya, Dato Sri Fatimah madah, semua bantu nya udah dipejalaika kenyau ari 2018 nyentuk 2021.

Nimbal tanya bekaul enggau bantu ke udah dipejalaika ngelui lima taun ke udah, iya mega madah, pemutus nandu baru bantu nya bepanggai ba perintah nengeri.

“Perintah Sarawak deka ngaga pemutus baikka dipajakka tauka enda ti bepun ari ripot opis menteri tu,” pia ku iya. -EDISI UKAS