Projek JBALB Nyungkak Pemanah Servis Ai Di Sibu

HARI LIMA, 8 APRIL 2022

SIBU: Projek Opis Ai Menua Pesisir (JBALB) ngaga paip nambah ngagai 1,600 milimeter ari 600 milimeter iya ke diatu deka mutarka penanggul ai di Sibu.

Menteri Muda Pengerai Mensia Mayuh, Pengawa Berumah enggau Perintah Kandang Menua II, Michael Tiang Ming Tee madah, projek nya deka nambahka penguat ai ba genturung menua tungga ke Pasai Siong, Ulu Sungai Merah enggau Teku sereta Timur Sibu Jaya ti dipelabaka tembu bulan tu.

“Ketegal pengawa ngaga projek tu, mensia mayuh ba genturung menua nya betapi enggau penanggul ai alai bisi sekeda ari paip dia pechah.

“Tang penguat ai deka manah agi ujung bulan tu,” pia ku iya madah udah datai mendingka penerang bekaul enggau ai ba Opis Ai Sibu, kena Hari Tiga tu tadi.

Iya ke mega Kaban Kunsil Nengeri (ADUN) Pelawan madah, projek nya empai chukup alai iya deka ngansak mayuh agi projek bekaul digaga baka projek ngaga pam ai enggau tangki besai.

“Aku deka ngansak agih belanja diberi dikena ngaga projek tu ba kandang lima taun deka datai ungkup DUN Pelawan,” ku iya madah baru.-EDISI UKAS

add comment