HARI SATU, 11 APRIL 2022
KUCHING: Sarawak melabaka 1.2 juta iku temuai deka datai nemuai ngagai nengeri tu ba taun 2022 lalu disadang ulih ngasilka RM3.2 bilion resit dagang temuai.
Sapit Menteri Dagang Temuai Sarawak, Datuk Sebastian Ting madah, Komiti Koordinator Dagang Temuai Nengeri Sarawak (JPPNS) madahka penatai temuai niki 593.2 peratus iya nya 229,678 ari Januari nyentuk March taun tu enti dibida enggau timpuh ke sama ba taun siti tadi.
Ku iya, resit dagang temuai mega nambah 569.25 peratus iya nya RM517 juta enti dibanding enggau timpuh ke sebaka ba taun 2021.
“Ba taun tu, Sarawak andal deka nerima penatai 1.2 juta iku temuai lalu ulih ngasilka RM3.2 bilion resit dagang temuai.
“Taja dagang temuai entarabansa bisi lubah ‘suman’ tang dagang temuai ba menua kitai deka mansang angkat,” pia ku iya madah ba aum media sepengudah betuaika aum JPPNS di Kuching, kena Hari Satu.
Nambahka jaku iya, Datuk Sebastian mega madah, udah dua taun napi pengelekai COVID-19, perintah Sarawak ti betuaika Premier Sarawak Datuk Patinggi Tan Sri (Dr) Abang Zohari Tun Datuk Abang Openg udah mayuh nyaup rayat lebih agi ba pekara belanja ti ulih dipeda ari Bantu Khas Sarawakku Sayang (BKSS) Renggat 1.0 nyentuk 8.0 ti bekenaka belanja RM5.58 bilion.
Kelimpah ari nya, iya madah, opis menteri iya enggau ejensi bekaul deka ngatur baru program udah pintu entara menua dibuka baru alai program nya tau bendar matak beribu iku temuai ke Kuching tang deka terit diatur nitihka Atur Operasyen Standard (SOP) ti patut. -EDISI UKAS
