Politik Nyura Pemansang Menua

HARI SATU, 11 APRIL 2022

SUNGAI BAWANG: Gaya politik beguna bendar dikena nyura pemansang menua nyengkaum ba sitak Kunsil Nengeri (DUN) Kakus.

Senator Datuk Dr.Nuing Jeluing madah, semua pemansang baka projek karan enggau jalai alun Sungai Bawang bepun ari pengawa politik.

“Politik ke likun nyadi batang pekara dikena nempa pengelantang ngagai sesebengkah menua nyengkaum projek pemansang,” pia ku iya madah maya bejadika Aum Besai Pati PBB Sungai Bawang ba Rumah Lukok Munjie, Jalai Sungai Bawang di Selangau, kena Hari Minggu tu tadi.

Ba aum nya, iya mega ngelalau tiap iku raban parti PBB lebih agi Tuai Raban Nembiak chakah nambahka pemayuh penyampau raban sida dikena ngenegapka agi parti nya.

Pengawa sehari nya bela digulu Pemancha Gerosen Jubin ke mega nyadi Tuai Koordinator, Kaunsilor Minggu Angga enggau Tuai Pati PBB Sungai Bawang, Tuai Rumah Lukok Munjie.-EDISI UKAS

add comment