HARI MINGGU, 17 APRIL 2022
KUALA LUMPUR: Perintah Sarawak nagih formula engkeman ungkup pengawa magi asil ngagai nengeri baka ke udah disempekat dalam Pekara 112D Kunstitusyen Perintah Besai.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah nengeri bedau bulih formula ke engkeman ari perintah besai bekaul enggau pekara nya.
“Kitai deka nagih formula ke engkeman sentang bakani penyampau asil nya diulihka.
“Seagi formula tu enda ditemu, kitai endang enda mudah nerima ngapa,” ku iya bejaku maya ba Program Sungkei Enggau Premier Abang Jo 2022 di Kuala Lumpur kena Hari Enam tu tadi.
Berebak enggau nya, iya madah Perintah Sarawak deka neruska pengawa nagih hak nengah chara ke bisi nyengkaum nengah Komiti Entara Perintah (IGC) sereta jalai bukai ke bekaul.
Datuk Patinggi Tan Sri Abang Zohari madahka utai ke ditegi Perintah Sarawak endang ungkup pemaik rayat di nengeri tu jemah.
Seninjik ari nya, Datuk Patinggi Tan Sri Abang Zohari madah, Perintah Sarawak seruran bebendar mantu rayat ba nengeri tu ke napi penusah ketegal pengelekai COVID-19 enggau penusah bukai, nyengkaum nembiak enggau sida ke diau ba Semenanjung Malaysia.
Ku iya, Perintah Sarawak udah ngagihka bantu beungkus urung RM5.8 bilion dikena mantu rayat nengah Bantu Khas Sarawakku Sayang (BKSS) 1.0 nyentuk 8.0.
Nambahka nya, ku iya, naka tu bisi 38,106 iku nyengkaum 21,214 nembiak ke benung belajar ba Semenanjung Malaysia udah dibantu.
“Maya timpuh pendemik, Perintah Sarawak udah nyaup beberika bantu beungkus urung RM5.8 bilion dikena nyaup rayat ti napi empas pendemik tu nengah BKSS 1.0 nyentuk 8.0.
“Tu meh sebagi ari chara perintah kitai seruran ngemeratka penusah ke ditapi rayat Sarawak kelebih agi sida ke diau di luar menua Sarawak kelimpah napi pengelekai COVID-19 enggau mega Virus Omicron,” ku iya nambah.
Ba program nya mega, Premier Sarawak enggau bini iya, Puan Sri Datuk Amar Juma’ani Tun Tuanku Bujang bisi nyuaka pemeri ngagai 53 nembiak Palan Pelajar Tinggi (IPT) ari baruh pelanja Yayasan Sarawak enggau sida ke belajar di Semenanjung Malaysia.
Pemeri nya mega mungkur ungkup 9 iku indai tunggal, 11 anak patu balu, 3 iku indai tunggal enggau anak patu balu, 3 pengari staf Yayasan Sarawak di Kuala Lumpur enggau 3 pengari staf Opis Kaul Sarawak di Kuala Lumpur.
Pengudah tembu bebuka puasa, Premier Sarawak begulai enggau temuai ke bisi datai besembiang Solat Maghrib, Isya enggau Terawih beraban.
Entara ke bisi datai ba program tu bala Sapit Premier Sarawak, Datuk Amar Awang Tengah Ali Hasan enggau Dato Sri Professor Dr. Sim Kui Hian, Speaker Kunsil Nengeri Sarawak, Datuk Amar Mohamad Asfia Awang Nassar, Sekretari Perintah Nengeri Sarawak, Datuk Amar Jaul Samion, Kaban Parlimen Gabungan Parti Sarawak (GPS) enggau ADUN Sarawak.
Program ke diatur begulai Opis Premier Sarawak, Opis Kaul Sarawak Kuala Lumpur enggau Yayasan Sarawak Pampang Kuala Lumpur nya dikena ngedut kaul peranak Sarawak di Semenanjung Malaysia kelimpah dikena ngerami anak patu balu enggau indai tunggal peranak Sarawak di Lembah Klang. -EDISI UKAS
