HARI DUA, 19 APRIL 2022
KUCHING: Tambang bilun ari Semenanjung Malaysia ngagai Sarawak enggau Sabah udah majak nurun beserimbai enggau pengerami Hari Raya Aidilfitri taun tu.
Menteri Perengka Pengangkut Malaysia, Datuk Seri Ir. Wee Ka Siong madah, pekara tu bepelasarka asil randau enggau atur proaktif opis menteri iya begulai enggau Malaysian Aviation Commission (MAVCOM) sereta kompeni penerebai bilun domestik.
“Nitihka perati MAVCOM, tambang bilun kelas ekonomi entara RM105 ngagai RM1,398 ba kandang 27 April nyentuk 8 Mei 2022 lalu RM195 ngagai RM1,398 ba kandang 28 April nyentuk 1 Mei 2022.
“Ari penyampau tambang bilun nya, mayuh tambang disedia ngagai semua pejalai penerebai bilun ngagai Sarawak enggau Sabah dalam timpuh ke dipatau semina urung RM300 ngagai RM500,” ku iya madah ba penerang media, kena Hari Satu.
Ku iya, enti dibanding sebedau tu enggau 14 April 2022, tambang bilun maya nya urung RM105 ngagai RM2,084 alai majoriti tambang bilun ditetapka entara RM700 ngagai RM1,200
“Pekara tu endang berita gaga ngagai rayat Sarawak enggau Sabah ti deka pulai nyerumba tambang bilun udah nyenggala nurun,” ku iya madah.
Nambahka jaku iya, iya nangkan mensia mayuh ngatur pejalai sida lalu beambi ulih enggau tambang bilun ti dipelabaka majak nurun. -EDISI UKAS
