Pesta Benak Sri Aman 2022 Diatur Baru Kena 9-11 September Tu

HARI EMPAT, 21 APRIL 2022

SRI AMAN: Pesta Benak deka diatur baru kena 9 ngagai 11 September ke deka datai udah dua taun diketuka ketegal pandemik COVID-19.

Sapit Menteri Pelajar, Inovasyen enggau Pemansang Pengelandik Sarawak, Datuk Francis Harden Hollis madah, pemutus ngatur baru pengerami nya bepun ari menua tu udah ngalih ngagai renggat endemik.

“Kelimpah endang agi bisi ngatur Lumba Perau, pengerami tiga hari berunggu tu bela disempulang enggau program bukai baka program pemandang pemansang, pemandang ari institusyen pelajar, Bazar Ria, program panggau ti ngayanka macham main asal nyengkaum Ratu Benak, Pekit Kebaya Nyonya sereta mayuh agi ke bukai.

“Serak tu mega, palan pengerami deka diatur ba Sri Aman Waterfront ke diatu udah tembu,” ku iya sambil madah pengerami nya ila deka dipenyadi Premier Sarawak.

Iya madahka pekara tu maya betuaika Aum Komiti Pesta Benak 2022 begulai enggau Chairman Komiti Besai Pesta Benak 2022, Datu Indit Bangai di Opis Residen Sitak Sri Aman, kena Hari Tiga.

Nambahka jaku iya, Datuk Francis ke mega Kaban Kunsil Nengeri Simanggang madah, komiti pengerami bela melabaka pengerami serak tu deka mujur matak mayuh temuai baikka ari menua tu empu tauka menua bukai.

Ku iya, pengerami nya kepenudi diatur ba taun 2019 sebedau menua tu betapi enggau pandemik COVID-19.- EDISI UKAS

add comment