HARI EMPAT, 21 APRIL 2022

KUCHING: Program betuchuk dos ‘booster’ kedua vaksin COVID-19 deka diatur di Sarawak berengkah 22 April 2022.

Sapit Premier Sarawak, Datuk Amar Douglas Uggah Embas madah, program ti dibagi ngagai dua kategori tu diatur ba semua Palan Meri Vaksin (PPV) di klinik perintah enggau klinik luar sereta sepital luar.

“Kategori keterubah iya nya ngagai sida ke beumur 60 taun ke bisi komorbiditi lalu kategori kedua iya nya ngagai sida ke beumur 12 taun enggau ke atas ke bisi ‘imunocompromised’ jelan enggau raya,” pia ku iya nengah penerang media, kena Hari Tiga.

Iya ke mega Chairman Komiti Penyangga Penusah Nengeri (JPBN) Sarawak bela madah, di Sarawak bisi 1,637,167 iku tauka 90 peratus udah betuchuk dos ‘booster’naka 19 April 2022.

“Nya alai, aku minta 181,589 iku agi sida ke ulih betuchuk anang laun ngambi dos tu,” ku iya.

• 

Dulu ari nya, iya nerima penemuai basa ari Direktor Opis Pengerai Sarawak ke baru, Dr. Ooi Choo Huck ba opis iya di Wisma Bapa Malaysia.

Dr. Ooi dipadu megai pengawa nya kena 1 March tu tadi nyilih Datuk Dr Mohamed Sapian Mohamed. -EDISI UKAS