Yang Di-Pertuan Agong Enggau Raja Permaisuri Mujur Datai Di Sarawak

HARI EMPAT, 21 APRIL 2022

KUCHING: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau Raja Permaisuri Agong Tunku Azizah Aminah Maimunah Iskandariah mujur datai ba Padang Bilun Entarabansa Kuching ditu, kena Hari Empat.

Bilun khas mai penatai seduai Seri Paduka terengkah pukul 12.05 ngalih hari alai penatai nya diambat Tuai Megai Menua (TYT) Nengeri Sarawak, Tun Pehin Sri Abdul Taib Mahmud enggau bini, Toh Puan Datuk Patinggi Raghad Kurdi Taib.

Bela datai nyambut iya nya Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini, Datin Patinggi Puan Sri Jumaa’ni Tun Tuanku Bujang.

Speaker Kunsil Nengeri Sarawak, Tan Sri Mohamad Asfia Awang Nassar enggau dua Sapit Premier Sarawak, Datuk Amar Douglas Uggah Embas enggau Datuk Amar Awang Tengah Ali Hasan sereta Sekretari Perintah Sarawak, Datuk Amar Jaul Samion mega bisi maya nyambut penatai nya.

Seduai Seri Paduka dilanggur bejalai ngagai Bazar Ramadan Satok lemai tu sebedau ngulu Pengerami Buka Puasa enggau Makai Lemai di Masjid Jamek Nengeri.

Ba pengerami nya, seduai Seri Paduka deka nyuaka pemeri ngagai 30 penerima. -EDISI UKAS

add comment