HARI LIMA, 22 APRIL 2022

KAPIT: Perintah Sarawak ngungkupka belanja RM1.3 juta ari Pelin Pemansang Malaysia Lumpar Ke-12 ngagai Opis Sungai-Sungai Sarawak (LSS) dikena ngaduka pansik hidrografi ari Nanga Baleh ngagai Penyangkai Belaga.

Sapit Menteri Perengka Pengangkut II, Dato Henry Harry Jinep madah, pansik nya digaga dikena nentuka endur ke patut sereta likun ditengah semua sida ke ngena perengka pengangkut sungai ba sitak Kapit.

“Taja orang ti betengahka sungai majak mimit ketegal bisi genturung pendiau di Kapit udah datai jalai tang sungai kelimpah nyadika jalai bela ngepunka kuasa hidro enggau eko-dagang temuai.

“Nya alai, LSS enda bechiping neritka adat ngagai sapa ke ditemu ngereja penyalah baka bebuaika uras ke sungai ti tau ngeruga pengelikun mensia mayuh betengahka sungai kelimpah ngamahka rampa menua,” pia ku iya maya Program Pengelikun enggau Pemeresi Sungai ba Penyangkai LSS di Kapit, kena Hari Empat.

Dato Henry mega madah, Perintah Sarawak semampai ngemerat sereta nentuka sistem perengka pengangkut ke likun enggau lantang dikena mensia mayuh.

“Ketegal tu, Perintah Sarawak semampai beberika agih belanja ngagai LSS dikena ngaduka pemanah enggau pengelikun penyangkai sereta pengawa bukai bekaul enggau sungai.

“Semua tu digaga kitai ketegal ngira pengelantang enggau pengelikun rayat,” ku iya madah.

Ba program nya, beberapa iti ejensi perintah bisi mantaika licha baka ari LSS, Opis Pengeraja Asal enggau Rampa Menua (NREB), Opis Pengerai Malaysia (KKM) enggau Opis Perengka Pengangkut Jalai (JPJ).

Sama bela datai, Sapit Menteri ba Opis Premier Sarawak, Jefferson Jamit Unyat, Kaban Kunsil Nengeri (ADUN) Pelagus, Wilson Nyabong Ijang, ADUN, Baleh Nicholas Kudi Jantai enggau Chairman LSS, Dr Murni Suhaili. -EDISI UKAS