HARI SATU, 25 APRIL 2022
TANJUNG MANIS: Kaban Kunsil Nengeri (ADUN) Semop, Datuk Abdullah Saidol mengkang nyadi Tuai Pampang PBB N42 Semop udah menang ba Aum Perwakilan Tri-Tahunan PBB Pampang DUN Semop, kena Hari Minggu.
Aum ke diatur ti diuluka Sekretari Politik Premier Sarawak, Kenil Jaraiee enggau Faridah Osman di Dewan IKS, Tanjung Manis bela ngemataka Rudy Suib dipilih nyadi Sapit Pampang nya alai Komiti Tuai Orang Indu enggau Tuai Raban Nembiak dipegai Rosiah Deni enggau Ariffin Akoh.
Ba jaku iya, Datuk Abdullah ke mega Sapit Menteri ba Opis Premier Sarawak (Pekara Korporat, Pemadah enggau UKAS) nesau ngiarka diri ari ulah ke tau ngeruga penyerakup rayat ba DUN nya.
Iya madah, taja kandang DUN Semop mayuh agi Bumiputera tang penyampau orang Melanau, Melayu enggau Iban nyauka sebaka.
Iya mega minta Parti Pesaka Bumiputera Bersatu (PBB) Pampang DUN Semop ngemeratka pemansang infrastruktur, pengintu pengelantang enggau sosioekonomi rayat seririh enggau julu ati perintah ngemansangka endur nya.
“Nyema tiga pekara tu dikemeratka, takah pemansang entara mengeri enggau menua pesisir ulih disungkakka,” ku iya.
Ku iya madah, aum tu bela numbuhka Biro Pemansang, Biro Pengintu Pengelantang, Biro Sosioekonomi, Biro Modal Insan enggau Biro Program dikena ngemujurka pekara nya.
“Biro-biro tu megai tanggungpengawa nentuka isu pengelantang enggau sosioekonomi semampai diperatika lalu diputar enggau lengkas,” pia ku iya.
Aum ti digulu 252 iku ari Pati Pampang PBB DUN Semop nya dipenyadika Sapit Menteri ba Opis premier Sarawak (Integriti enggau Ombudsman), Datuk Dr Juanda Jaya.
Datuk Dr Juanda ngelalau semua kaban PBB semampai nyikap diri ngetanka parti enggau engari rayat.
“Kaban PBB mesti nyikap diri enggau penerang ke betul dikena nyeliah mayuh bengkah jaku petenah raban penyakal,” ku iya.
Pengerami nutup aum nya dipenyadika Kaban Parlimen Tanjong Manis, Ir. Yusuf Wahab.
Maya tu, Ir. Yusuf minta semua raban PBB semampai besaup enggau genturung pendiau dikena nentuka projek pemansang ke benung digaga ba tiap bengkah genturung pendiau enggau rumah panjai mujur dipejalaika.
Iya mega minta sukung ngagai Gabungan Parti Sarawak (GPS) diteruska ba Pengawa Bepilih Besai Menua (PRU) ti dipelabaka deka diatur sebedau ujung taun tu. -EDISI UKAS
