750 Pegawai, Raban Polis Deka Ngemujur Op Selamat Ke-18 Beserimbai Hari Raya Aidilfitri 2022

HARI LIMA, 29 APRIL 2022

KUCHING: Bisi 750 pegawai enggau raban polis kontijen Sarawak deka ngemujurka Op Selamat Ke-18 beserimbai enggau Hari Raya taun tu.

Pesuruhjaya Polis Sarawak, Dato Mohd Azman Ahmad Sapri madah, pengawa nya ke sekali tu dikemujurka ari macham pampang enggau opis ba Polis Diraja Malaysia (PDRM) kontijen Sarawak ti mungkur semua pelilih di nengeri tu.

“Raban kami ukai semina nentuka pengelikun ba jalai alun aja tang mega bela deka nentuka pengelikun rumah ke ditinggal maya pulai ke menua nyambut Hari Raya,” pia ku iya.

Iya madah munyi nya ba aum media nangkan pengawa bejadika Op Selamat Ke-18 beserimbai Hari Raya Aidilfitri Taun 2022 di Kuching, kena Hari Empat.

Ba pekara bukai, iya mega madah, penyampau kes bebadi ba jalai alun dalam kandang januari nyentuk march taun tu bisi nambah 667 kes iya nya 18.6 peratus enti dibanding enggau taun 2021 iya nya ari 3,586 kes ngagai 4,253 iti ba taun 2022.

Beduduk ari pekara nya, iya ngelalau mensia mayuh semampai nitihka atur ba jalai alun lebih agi maya musim pengerami tu.

“Kitai deka neritka atur tauka ngukum sida ke ditemu ningkah atur ba jalai alun,” ku iya nambah. -EDISI UKAS

add comment