HARI LIMA, 6 MEI 2022

KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg bela enggau bala pemesai dunya ke bukai datai ba Gempuru Besai enggau Program Pemandang Hidrogen Dunya 2022 Rotterdam ke diatur di Belanda ari 9 nyentuk 11 Mei tu.

Opis Premier Sarawak nengah penerang media kena Hari Lima madah, iya deka ngenataika jaku ba pengawa nya ke mega nyadi pengelicha kedua ba slot 20 minit ti ngemunka gempuru besai nya.

Iya disadang mantaika penemu bekaul enggau rambai jaku ‘Ngelengkaska Ekonomi Hidrogen Global: Chara Sarawak’ ti bela ngayanka Sarawak nyadi nengeri ke majak mansang ba pekara kuasa ulih dikena baru.

Muakka lemai hari satu nya, Datuk Patinggi Tan Sri Abang Zohari enggau deligit iya dipadahka deka nemuai ngagai Opis Shell di Haque alai maya nya Eksekutif Besai Shell deka mantaika penerang ti nyengkaum bekaul enggau kuing dudi hari Shell di Sarawak.

Hari Siti, Premier Sarawak deka betemu enggau Pegawai Eksekutif Penyangkai Kapal Rotterdam lalu lemai nya iya enggau deligit dibai ngabas Palan Teknologi Shell di Amsterdam ti mantaika teknologi hidrogen kompeni multinasional sereta bemacham inovasyen baru ke bukai.

Deligit nya deka ke Oslo kenaka Hari Tiga.

Bela nyempulang iya maya tu ila iya nya Sapit Premier Sarawak, Datuk Amar Douglas Uggah Embas, Sekretari Perintah Sarawak, Datuk Amar Jaul Samion, Sapit Menteri Kuasa Enggau Pengelikun Rampa Menua, Dr Hazland Abang Hipni, Sekretari Wang Sarawak, Dato Sri Dr Wan Lizozman Wan Omar, Direktor Unit Pengatur Ekonomi, Datu Dr Muhammad Abdullah Zaidel, Chairman Pemansang Ekonomi Sarawak (SEDC), Tan Sri Datuk Amar Abdul Aziz Hussain, Chairman Sarawak Energy Berhad (SEB), Datuk Amar Hamed Sepawi Enggau Tuai Pegawai Eksekutif SEB, Datu Sharbini Suhaili. -EDISI UKAS