HARI DUA, 17 MEI 2022

KUCHING: Sarawak deka majakka pengeransing nyerungkai penemu baru dikena numbuhka pemansang dudi hari, seririh enggau juluk ati nyadi nengeri mansang manggai taun 2030.

Tuai Megai Menua Nengeri Sarawak, Tun Pehin Sri Abdul Taib Mahmud madah, iya berasai temegah ati meda Sarawak nyadi menua ba rintai keterubah ngaduka pemansang Ekonomi Hidrogen di Asia Tenggara (SEA).

“Ekonomi Hidrogen deka mulaika pemaik enggau penguntung ngagai penegap ekonomi Sarawak udah kitai enda kelalu bepanggai ba industri lama.

“Kitai deka nempa pun penatai ke baru,” pia ku iya madah maya bejaku ba Pengawa Bejadika Aum Kedua Penggal Keterubah Kunsil Nengeri (DUN) Sarawak Ke-19, kena Hari Dua.

Nambahka jaku iya, Tun Pehin Sri Abdul Taib madah, ulah besaup sektor peribit enggau perintah menua bukai deka mai pemaik ngagai dagang karbon nengah asil baru ari kampung ti digagaka nyadi projek dagang nya.

Kelimpah ari nya, iya bela minta mayuh agi sektor peribit ngambi bagi ba sektor betanam betupi nengah aplikasyen moden baka Internet Of Things (IOT) ba tuju nambahka asil betanam betupi.

“Aku andal beberapa taun deka datai, sektor betanam betupi di Sarawak deka berubah ngagai sektor ti mulaika penatai ke besai lalu nyadi menua mansutka pemakai di Malaysia,” ku iya madah. -EDISI UKAS