Terminal Bas Deka Digaga Di Pasar Kapit

HARI EMPAT, 19 MEI 2022

KUCHING: Terminal bas patut digaga ba Pasar Kapit udah bas ari Sibu ke Kapit berengkah bejalai pun taun tu tadi.

Sapit Menteri Perengka Pengangkut (Penerebai Bilun enggau Jalai Alun), Datuk Dr Jerip Susil madah, servis bas nya begunaka terminal bas kelimpah perengka guna ke bukai di Pasar Kapit.

Ketegal nya ku iya, opis menteri iya udah berandau enggau ejensi perintah bekaul berundingka endur ti engkeman alai ngaga terminal bas nya.

“Randau entara Kaunsil Pelilih Kapit, Opis Tanah enggau Servei Sitak Kapit enggau Opis Pemansang Pengawa Berumah (HDC)ti betuaika Residen Sitak Kapit deka diatur dulu sebedau peminta nentuka palan ngaga terminal bas nya ulih dibai ngagai Kaunsil Pengatur Nengeri ngambi diperunding lalu dikemendarka,” pia ku iya.

Iya bejaku munyi nya maya nimbal tanya Kaban Kunsil Nengeri (ADUN) Pelagus, Wilson Nyabong Ijang ba Aum Kunsil Nengeri (DUN) Sarawak Ke-19, kena Hari Tiga.

Nambahka jaku iya, Datuk Dr Jerip madah, peminta belanja dikena ngaga terminal bas ba Pasar Kapit deka digaga nengah Kajian Separuh Penggal (KSP) Langgur Pemansang Malaysia Lumpar Ke-12 Nengeri.

“Mensia mayuh ti bekenaka bas di Kapit deka lantang agi enti terminal bas tu udah bisi ila,” ku iya madah. -EDISI UKAS

add comment