HARI SATU, 23 MEI 2022
KUCHING: Empat buah rumah panjai ba Song udah disambung internet nengah teknologi Very Small Aperture Terminal (VSAT), sebagi ari inisiatif Wifi SALURAN.
Rumah panjai tu iya nya Rumah Guntor Takan, Song, Rumah Sidi (Nanga Nayai, Ulu Katibas), Rumah Lucy (Nanga Lanang, Tekalit) enggau Rumah Api (Nanga Terusa, Ulu Katibas).
Servis tu dipadahka dikena ba timpuh enda lama aja.
Lalu ba servis lama, arus internet nengah SMART Renggat 1 digaga nengah tiga iti tiang di Nanga Lanang, Nanga Barok di Tekalit enggau Nanga Banjor.
Sapit Menteri Utiliti enggau Telekomunikasyen, Datuk Liwan Lagang madah, aruh 4G ba pelilih Song digaga ba genturung pendiau ba penyampau tubuh mensia mayuh ke udah nambah 32.04 peratus ba suku keterubah 2022 ari 26.02 peratus sebedau ba suku keempat 2021.
“Servis tu deka dikemanahka agi sepenembu macham bengkah program nengah SMART enggau JENDELA ba taun ke deka datai ti digaga SMA, MCMC enggau SDEC,” pia ku iya maya nimbal tanya Kaban Kunsil Nengeri (ADUN) Katibas, Lidam Assan ba Aum Kunsil Nengeri (DUN) Sarawak Ke-19, kena Hari Satu.
Nambahka jaku iya, Datuk Liwan madah, 49 bengkah endur di Katibas digagaka enggau chara interim ungkup servis internet lalu nengah inisiatif Akses Tanpa Wayar (jalur lebar satelit) digaga nengah Pelan Jalinan Digital Negara (JENDELA).
Ba program ngerembaika bungkur arus 4G, bisi 19 iti bengkah endur udah ditentuka ba Katibas.-EDISI UKAS
