Pansik Dikena Nyerenih, Nyungkakka Tikas Kort Bumiputera Sarawak Benung Dipejalaika

HARI SATU, 23 MEI 2022

KUCHING: Perintah Sarawak diatu benung bejalaika pansik dikena nyerenih baru sereta nyungkakka tikas pemanah Kort Bumiputera Sarawak.

Sapit Menteri Ba Opis Premier Sarawak (Undang-Undang Enggau Adat Anak Nengeri, Jefferson Jamit Unyat madah, pansik nya deka digagaka nyadi pelin besai (Master Plan) ti ngembuan tuju ngubah Kort Bumiputera Sarawak nyadi siti institusyen akim baka Kort Sivil enggau Kort Syariah.

“Naka ke diatu pansik nya udah ba renggat kepenudi alai Perintah Sarawak benung ba renggat berati sereta mansik penemu ke dibantai bala konsultan.

“Udah nerima ripot kepenudi ari konsultan, Komiti Teknikal enggau Komiti Pemandu, perintah deka mantaika asil nya ngagai kabinet nengeri.

“Ubah Kort Bumiputera Sarawak tu disadang deka belabuh dikena perintah ba taun 2023,” pia ku iya.

Iya bejaku munyi nya maya nimbal tanya Kaban Kunsil Nengeri (ADUN) Bukit Semuja, John Ilus ba Aum DUN Ke-19 kena Hari Satu.

Ba tanya tambah, Jefferson madahka langgur deka numbuhka kort baru nyengkaum Numbuhka Palan Opis Kort Sarawak enggau Palan Kandang Menua iya nya Palan Opis Kort Sarawak enggau Palan Kandang Menua Kuching ke mungkur Sitak Kuching, Samarahan enggau Serian lalu Palan Kandang Menua di Sibu (Sibu, Mukah enggau Sarikei) enggau di Miri (Miri enggau Limbang).

Iya nerang, langgur numbuhka Palan Kort Majistret Pelilih di Betong ungkup Sitak Betong enggau Sri Aman, Sitak Kapit enggau Sitak Bintulu.-EDISI UKAS

add comment