HARI DUA, 24 MEI 2022
KUCHING: Sarawak patut beambi ulih ari penau ekonomi digital ke disadang ngerembai mansang lebih agi ba nengeri tu manggai taun 2025.
Nitihka ripot, Malaysia ngerikod penatai e-Dagang enggau penyampau RM279 bilion ba taun 2020 lalu nambah ngagai 17.1 peratus ba suku ketiga taun 2021.
Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, e-Dagang meri penatai 11.5 peratus ngagai Penatai Dalam Menua (KDNK) Malaysia ba taun 2020 enti dibanding enggau 8.5 peratus ba taun 2019.
“Nya alai, kitai di Sarawak patut beambi ulih ari penau pengerembai ekonomi digital ti disadang ulih meri penatai urung 25 peratus ari KDNK dunya tauka sama enggau USD 25 trilion,” pia ku iya.
Iya bejaku munyi nya Pengerami Ramah Tamah Aidilfitri enggau Mantar Gawai Dayak Sarawak Multimedia Authority (SMA), kena Hari Satu.
Premier Sarawak mega madah, dikena ngenegapka agi ekonomi digital, patut bisi teknologi baru baka Artificial Intelligence (AI), 5G, Internet Of Thing (IoT), Cloud, Block Chain, Big Data sereta pemansang teknologi rama ke bukai dikena bejadika tuju juluk ati Sarawak ba taun 2030.
“Ketegal nya, udah pengawa bepilih tu tadi, aku nambah ‘Telekomunikasyen’ ba Opis Menteri Utiliti laban kitai ngemeratka pemansang telekomunikasyen seraya ngubah chura ekonomi ungkup pemansang ke lebih agi dudi hari ila,” ku iya madah baru.
Ba pengerami nya, Datuk Patinggi Tan Sri Dr Abang Zohari ke mega Chairman SMA bisi nyuaka pemeri Kelab SMA ngagai tiga gerempung Pemulihan Dalam Komuniti (PPDK) iya nya PPDK Gedong, PPDK Sri Satok enggau PPDK Betong bela RM5,000.-EDISI UKAS
