HARI TIGA, 25 MEI 2022
KUCHING: Perintah Sarawak udah ngatur mayuh macham pengawa dikena bejadika juluk ati deka meda selampur nengeri tu bela ngasaika pemansang ari projek ai beresi.
Menteri Utiliti Enggau Telekomunikasyen Sarawak, Datuk Julaihi Narawi madah, tu nyengkaum program grid ai nengeri enggau Program Ai Alternatif Sarawak (SAWAS).
Ku iya, ba tuju ke sebaka, ‘The Borneo International Water & Wastewater Exhibition & Conference’ (BIWWEC) 2022 deka diatur tiga hari berunggu belabuh 17 nyentuk 19 Oktober taun tu.
“BIWWEC deka nyadi platform alai berandauka penanggul ke bisi nyadi enggau chara mutar ti inovatif bekaul enggau ai di Sarawak nyengkaum di Borneo.
“Awak tu bela dikena berandau sereta nempa inovasyen enggau teknologi baru ti engkeman dikena ba industri menua tu enggau entarabansa ba tuju nyungkakka pemanah ai sereta sistem ngaduka laluh ai di Sarawak baikka ba mengeri tauka menua pesisir,” ku iya madah.
Iya bejaku munyi nya maya aum media BIWWEC 2022 ba Bengunan DUN Sarawak, kena Hari Tiga.
Nambahka jaku iya, Datuk Julaihi mega madah, pekara bukai ti bela deka dirandau maya BIWWEC 2022 nya ila nyengkaum pelin mulaika pemanah udah COVID, grid ai, pengawa ngatur pun penatai ai, sistem ngatur laluh ai enggau transformasyen digital.
Sama bela datai, Sapit Menteri Utiliti enggau Telekomunikasyen (Telekomunikasyen), Datuk Liwan Lagang, Sapit Menteri Utiliti enggau Telekomunikasyen (Utiliti), Datuk Dr Abdul Rahman Junaidi enggau Sekretari Mendam Opis Menteri Utiliti enggau Telekomunikasyen, Dato Ir. Alice Jawan. -EDISI UKAS
