HARI TIGA, 25 MEI 2022
KUCHING: Perintah Sarawak udah ngungkupka agih belanja RM4 bilion nengah projek rakyat dikena ngaduka Program Grid Ai di Sarawak.
Menteri Utiliti enggau Telekomunikasyen, Datuk Julaihi Narawi madah, projek nya ngembuan tuju mutarka penanggul ai ke suah ditapi rayat alai tebal agi projek nya benung digaga lalu disadang tembu ujung taun 2023.
“Naka April 2022, bisi 288 ari 297 iti projek ke beungkus RM3.4 bilion udah dikemendarka digaga.
“Lalu 197 projek udah tembu, 91 iti agi benung digaga enggau semilan iti projek agi ditentuka penyampau tender enggau benung digagaka langkar.
“Aku pechaya, enggau penembu semua projek tu, penyampau enggau tikas pemeresi ai ba endur ke suah napi penanggul deka diputarka,” ku iya madah.
Iya nerangka pekara nya maya Aum Kunsil Nengeri (DUN) Sarawak Ke-19, kena Hari Dua.
Kelimpah ari nya, Datuk Julaihi madahka bisi 254 iti projek ai ke beungkus Rm4.51 bilion udah diberi pemendar digaga ba Langgur Pemansang Malaysia Lumpar Ke-12 (RMK-12) alai RM1.89 bilion ari penyampau nya dipelanja perintah sarawak ke nyengkaum 8 projek baru enggau 190 iti projek sambung.
Iya mega madahka, bisi tujuh bengkah pelin pemansang ai digaga ba RMK-12 ti nyengkaum ngaga grid ai nyengkaum ai mata, ngaga palan ngubat enggau sistem grid ai, stesyen pam, tangki nimbun ai enggau ngaga paip, program Sarawak Alternative Water Supply (SAWAS), mutarka ‘non-revenue water’ (NRW) enggau chara holistik, ngintu pemanah ai beresi, ngaga palan ngubat ai baru ‘one day storage’, ngemanahka palan ngubat dikena bulih 20% simpan margin (buffer) enggau ngaga sistem ai digital. -EDISI UKAS
