HARI EMPAT, 26 MEI 2022

KUCHING: Sarawak ngerikod lebih 300,000 kes covid-19 kenyau ari kes keterubah ditemu nyadi di nengeri tu kena bulan March 2020.

Sapit Premier Sarawak, Dato Sri Dr Sim Kui Hian madah, naka 28 April tu tadi, semua penyampau kes COVID-19 manggai 305,180 iti enggau 1,729 kes nabanka nyawa diripotka.

“Kelimpah ari nya, bisi 2.77 juta RT-PCR enggau sampel Antigen RTK profesional udah diterima,” pia iya madah.

Iya bejaku munyi nya ba Aum Kunsil Nengeri (DUN) Sarawak Ke-19, kena hari tiga.

Iya ke mega Menteri Pengerai Mensia Mayuh, Pengawa Berumah Enggau Perintah Menua madahka penyampau ngena katil Unit Siru Jaga (ICU) enggau katil ukai ICU bisi kurang ba kandang 27 March nyentuk 23 April 2022.

“Ari 30 peratus enggau 40 peratus ba Minggu Epid 13 (27 Mac-2 April 2022) nyadi 10 peratus enggau 26 peratus ba Minggu Epid 16 ( 17-23 April 2022).

“Tu mandangka pengelekai COVID-19 di Sarawak majak pulai suman,” ku iya madah baru.

Nambahka jaku iya, iya madah, Sarawak mujur ngerikod penyampau imunisasyen ke mayuh taja menua tu besai sereta tusah dilawa alai lebih 40 peratus rayat diau di menua pesisir.

“Naka 20 Mei 2022, 83 peratus ari penyampau tubuh rayat tauka 2,343,667 rayat Sarawak udah nembuka betuchuk vaksin dua dos.

“Enti nitihka umur, 91.1 peratus iya nya sida ke beumur 18 taun ke atas tauka 1,881,213 enggau 93.9 peratus nembiak 12 ngagai 17 taun tauka 271,465 mujur nembuka penyampau tuchuk vaksin,” -EDISI UKAS