Premier Sarawak Bejadi Karnival Digital Keterubah Di Sarawak

HARI TIGA, 8 JUN 2022

KUCHING: Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg udah bejadika Karnival Digital Simposium Entarabansa Transformasyen Industri Digital ti keterubah iya di Sarawak.

Karnival diatur Palan Penyulut Teknikal Sarawak (CENTEX) nya ngembuan tuju nyukung pengeransing Perintah Sarawak ngangkatka pengawa bekenaka teknologi digital sereta ngubah ekonomi Sarawak ngagai ekonomi digital.

“CENTEX mega udah mai pemain industri digital mandangka beberapa bengkah chara baru nyengkaum kereban,’software’, implikasi enggau semua ke ulih dikena ngangkatka ekonomi Sarawak nyadi ekonomi digital,” pia ku iya madah maya bejadika karnival nya di Kuching, kena Hari Dua.

Sekeda ari program ke diatur ba kandang dua hari berunggu nya nyengkaum Simposium Karnival Digital, Community Technical Outreach Program (TOP), Woksop Teknologi Pemun Pemansang Aplikasi Android, Woksop Teknologi Imersif Augmented Reality (AR) enggau Virtual Reality (VR) enggau Sambung Kabel Fiber Optik (Splicing).

Bela datai Sapit Premier Sarawak, Dato Sri Professor Sim Kui Hian, Menteri Pelajar, Inovasyen enggau Pemansang Pengelandik, Datuk Roland Sagah Wee Inn, Sapit Menteri Pelajar, Inovasyen enggau Pemansang Pengelandik (Pelajar Tinggi enggau Inovasyen), Dr Annuar Rapaee, Chairman CENTEX, Tan Sri Datuk Amar Mohamad Morshidi Abdul Ghani enggau Tuai Pegawai Eksekutif CENTEX, Syeed Mohd Hussein Wan Abdul Rahman.-EDISI UKAS

add comment