HARI TIGA, 8 JUN 2022
KUCHING: Bantu sekulasip ari Yayasan Sarawak endang diungkupka ngagai semua rayat Sarawak enda ngira bansa.
Nerangka pekara tu, ku Premier Sarawak ke mega Chairman Yayasan Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, agi bisi penemu madahka sekulasip nya semina diberi ngagai Bumiputera tauka Melayu aja.
“Penemu nya enda amat. Bantu tu ungkup semua peranak Sarawak.
“Ba tusun pengatur Yayasan Sarawak mega kitai bisi pengari ari bansa China iya nya Datu William Lee Boon Tong,” pia ku iya madah maya Pengerami Nyambut Penumbuh Ke-50 Yayasan Sarawak di Kuching, kena Hari Dua.
Ba pekara bukai, Datuk Patinggi Tan Sri Abang Zohari ngena awak nya ngenataika jaku pengaga ati ngagai Yayasan Sarawak ketegal sekumbang 50 taun tu udah mayuh nyaup sereta nempa anak Sarawak ngembuan pelajar tikas tinggi.
“Nitihka rikod, sida ke udah nerima bantu baikka sekulasip tauka jali iya nya bisi 1.83 juta,” ku iya madah baru.
Bela bisi datai ba pengerami nya, bini Premier Sarawak, Puan Sri Datuk Amar Juma’ani Tun Tuanku Bujang, Sapit Premier Sarawak, Dato Sri Profesor Dr. Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nassar sereta temuai dipebasa ke bukai.-EDISI UKAS
